Таван жилийн дараа гэхэд АНУ-д цагаан арьст хүүхдүүд цөөнх болно хэмээн тус улсын Хүн ам тооллогын агентлагаас гаргасан судалгаанд тэмдэглэжээ. Тус агентлаг АНУ-ын хүн амын өсөлт, жилд төрж байгаа хүүхдийн тоо, тэдгээрийн дотор арьсны өнгийн ялгаа ямар байгааг харьцуулан судалсан байна.

Судлаачдын тэмдэглэснээр цагаан арьстнуудын хүүхэд төрүүлэх нь жилээс жилд буурч байхад, латин америк гаралтай иргэдийнх жил бүр өсч байгаа гэжээ.  Тиймээс 2020 он гэхэд Америк хүүхдүүдийн 50.2 хувь нь өнгөт болон шар арьст хүүхдүүд байх бөгөөд цагаан арьс хүүхдүүд цөөнхөд тооцогдоно гэлээ. Энэ үзүүлэлт явсаар насанд хүрэгчдийн хэмжээнд яригдаж, 2044 он гэхэд нийт америкчуудын 50.3 хувь нь өнгөт болон шар арьст хүмүүс байх юм.

Хүн амын тооллогын агентлаг 2060 оны таамаглалыг ч мөн дэвшүүлсэн байна. 45 жилийн дараа АНУ-ын хүн амын 44 хувь цагаан арьст хүмүүс байх аж. Харин 28 хувь нь  латин америк, 14 хувь нь хар, 9 хувь нь ази, 6 хувь нь холимог арьстай хүмүүс байх аж. Түүнчлэн цагаач иргэдийн тоо ихээхэн нэмэгдэх бөгөөд америк дахь цагаачдын тоо 45 жилийн дараа тус улсын хүн амын 20 хувийг эзлэх юм байна.

Г.Үжин