Кени улсын зүүн хойд хэсэгт орших Гариссагийн их сургуульд террористууд халдаж 147 хүнийг хөнөөсөн аймшигт хэрэг дэлхийн нийтийг цочроож байна. Пүрэв гаргийн өглөө болсон халдлагын үеэр тус их сургуульд суралцдаг 587 оюутан террористуудаас зугтаж чаджээ. Гэхдээ тэдний 79 нь шархдаж бэртсэн гэлээ. Шархадсан хүмүүсийн заримынх нь биеийн байдал хүнд нөхцөлд байгаа тул хагалгаанд оруулахаар Найроби хотын эмнэлэгт хүргэсэн байна. Тиймээс амиа алдагсдын тоо нэмэгдэж магадгүй хэмээн мэдээлж байна. Энэхүү дэлбэрэлтийн үеэр аврах ажиллагаанд оролцсон зарим албан хаагчид шархаджээ.
Тэсрэх бөмбөг болон АК-47 буугаар зэвсэглэсэн дөрвөн этгээд эхлээд охидын дотуур байранд очиж христийн шашинт оюутнуудыг хөнөөж эхэлсэн байна. “Тэд исламын шашинтнуудыг хороогоогүй” хэмээн Гариссагийн их сургуулийн багш гэрчийн мэдүүлэг өгчээ.
Террористууд ажиллагааны үеэр амиа алдсан ч тэднийг Нигерид хүчээ аваад буй исламын хэт даврагч Аль-Шабааб бүлэглэлийн гишүүд хэмээн үзэж байна. Үүний зэрэгцээ Кенийн Засгийн газар тус бүлэглэлийн толгойлогч Мохамед Куногийн байршлын мэдээлэлд 20 сая кени шиллинг буюу 215 мянган ам.доллар амлажээ. Дотоод хэргийн яамны мэдэлснээр халдагчдын зарим нь дэлбэрч амиа алдсан байна. Гэхдээ тэднийг бөмбөгөө санаатайгаар дэлбэлсэн эсвэл ажиллагааны үеэр цагдаагийн суманд өртөн дэлбэрсэн эсэх нь тодорхойгүй байгаа юм.
Аймшигт хэргийн улмаас Кени-Сомали хилийн ойролцоох Гарисса, Важир, Мандера, Тана Ривер гэсэн дөрвөн мужид хөл хорио тогтоох зааварчилгаа өгсөн хэмээн Дотоод хэргийн сайд Жозеф Нкайссеру мэдэгдлээ.
Кенийн Ерөнхийлөгч Ухуру Кениата амиа алдсан хүмүүсийн гэр бүлд гүн эмгэнэл илэрхийлсэн байна. Тэрээр аюулгүй байдлын ажилтнуудыг бэлэн байдалд байж, сонор сэрэмжтэй ажиллахыг тушаажээ.
НҮБ-ын Ерөнхий нарийн бичгийн дарга Бан Ги Мүн аймшигт хэргийн дараа мэдэгдэл хйисэн байна. Тэрээр “НҮБ-ын зүгээс Кени улсыг терроризмоос урьдчилан сэргийлэхэд бүх талаар туслахад бэлэн байна” гэжээ.
Нигерийг цусаар уйлуулж буй Аль-Шабааб бүлэглэл гэж хэн бэ?
Сомалийн өмнөд хэсэгт төвтэй Аль-Шабааб бүлэглэл нь хөрш орнууддаа заналхийлж, олон хүний амийг хөнөөж буй дэлхийн зартай бүлэглэлүүдийн нэг юм. Тус бүлэглэлийн олон улсад учруулсан хор хохирлыг хэмжвэл Аль-Каида болон Исламын улс бүлэглэлийн дараа гуравдугаарт эрэмбэлэгдэж байна.
Мохамед Куно тэргүүтэй Аль-Шабааб нь Нигерь, Уганда, Сомали, Кени улсуудад томоохон халдлагуудыг зохион байгуулж олон мянган хүнийг хөнөөж байжээ. Тэд батлан хамгаалахын хүч султай, исламын олон урсгал байдаг орнуудыг эзэлж өөрсдийн шашны урсгал бүхий вант улс байгуулахыг эрмэлзэж байгаа юм.
Хамгийн сонирхолтой нь толгойлогч Мохамед Куно 2007 он хүртэл Гарисса муж дахь Исламын сургуулийн захирлаар ажиллаж байжээ.
Г.Үжин
www.24tsag.mn
