БНХАУ-ын Олон нийтийн аюулгүй байдлын сайд асан Жоу Юнкан их хэмжээний авлига авсан нь тогтоогдсон тухай тус улсын Прокурорын газраас албан ёсоор мэдэгдэл хийлээ.

Коммунист намын Төв хорооны Улс төрийн товчооны байнгын хорооны гишүүн асан 73 настай Жоу Юнканыг 2014 оны 12 дугаар сард авлига авсан, албан тушаалаа хэтрүүлэн ашигласан, улсын нууц задруулсан хэргээр шалгаж эхэлсэн юм. Жоу Юнканыг дээрх хэргүүдэд буруутай хэмээгээд уг хэргийг Тианжин хотын шүүхэд шилжүүлсэн байна.

Түүний гэм буруутай эсэхийг тогтоохоор өнгөрсөн таван орчим сарын хугацаанд нийт 300 гаруй хүнийг саатуулан шалгасан байна.Тэдний дунд Жоу Юнканы найз нөхөл гэр бүлийн гишүүдээс гадна улс төр, ажил хэргийн түншүүд багтсан аж.

Эрх баригчид Жоу Юнканб хууль зөрчиж идсэн мөнгийг 14.5 тэрбум ам.доллар хэмээн тодорхойлж байгаа юм.

Жоу Юнканыг авлигын хэргээр яллагдсан улстөрч Бо Силайн холбоотон гэж үздэг. Тэрээр 2003-2007 онд БНХАУ-ын Нийгмийг аюулаас хамгаалахын сайдаар, 2007-2012 онд хойш Коммунист намын Улс төрийн товчооны Байнгын хорооны гишүүнээр ажиллажээ. Энэ хугацаанд тэрээр Аюулгүй байдлын алба болон шүүхийг  хариуцдаг байжээ.

Г.Үжин