Монголчууд зууны манлай дуучин Сараагийн төрсөн өдрийг андахгүй билээ. Дуучин Б.Сарантуяа 4 дүгээр сарын 20-нд төрсөн өдөртөө зориулан ээлжит тоглолтоо хийх гэж байна. Түүний төрсөн өдрийн ес дэх тоглолт болох энэхүү тоглолтын нэр “Сэхүүн салхи”. Дуулсан дуу болгон нь хит болдог дуучин Б.Сарантуяагийн амьдралыг “Сэхүүн салхи” нь тэр чигт нь илэрхийлчихмээр "драм”-тай дуу. “Сэхүүн салхи”-ийг зөвхөн Б.Сарантуяад л зориулсан юм шиг, түүнээс өөр хүн ингэж амьдруулж чадахааргүй ч юм шиг ёстой л дуу, дуучин хоёр биесээ олсон гэлтэй. Өсвөр наснаасаа гараагаа эхэлсэн урлагийн төлөөх зүтгэл нь 30 шахам жилийн ардаа орхижээ. Поп хатагтай Сарантуяагийн амьдрал, амжилт, алдаа оноо нь олны нүдний өмнө үргэлж ил байсан бөгөөд дардан байгаагүйгээ хэзээ ч халхалж байгаагүй билээ. Тиймдээ ч "баггүй", шулуун шударга Сарааг ард олон хайрлан хүндэлдэг бизээ. Төрсөн өдрөө ард олонтойгоо тэмдэглэхийг Сараа олон түмнээсээ авсан хайр хүндлэлд барих чин сэтгэлийн билэг хэмээн чухалчилдаг гэлтэй. Дуучин Сараагийн төрсөн өдрийн тоглолтыг үзэх гэсэн чин үнэнч фэнүүд нь ч бий. Юутай ч зохиолч Б.Шүүдэрцэцэг  “Будаг шунхгүй би "үд өнгөрөөж, үхрийн дуунаар" гэрээс гарахдаа Сараа гавьяатаас өчигдөр бэлгэнд авсан "Best of Saraa" CD-с "Хайрласан сэтгэл", "Хайрын бурхан","Сэхүүн салхи"-г сонссон шигээ Хатан Туулынхаа эргийг эмжин, Хан уулынхаа бэлийг ороон давхисаар ажилдаа ирлээ. Хэнээс ч "Цалин авдаггүй, цаг бүртгүүлдэггүй" жаргалтай хүн би...Залуу нас, ой дурсамжийн ертөнцөд аялуулсан, цагийг эзэмдсэн дууч шувуухай Сараа чамдаа баярлалаа!” гэж  “жиргэжээ.” Дуучин Б.Сарантуяагийн олон хүнийг дурсамжийн ертөнцөөр аялуулна биз ээ.

Д.Ундрах /24tsag.mn/