Өнөөдөр МАХН-ын дарга Н.Энхбаярыг батлан даалтанд гаргах өргөдлийг хүү Э.Батшугар болон МАХН-ын гишүүд УПЕГ-т өгсөн боловч хэзээ хариу өгөх нь тодорхойгүй байгаа юм. Ингэж цаг алдах нь өлсгөлөн зарлаад 100 гаруй цаг болж байгаа, бие нь хүнд байгаа тул яаралтай арга хэмжээ авах хэрэгтэй гэж үзэж байгаа. Тиймээс МАХН-ын Чингэлтэй дүүргийн мянгатын дарга З.Баянсэлэнгэ, Ардчилал, шударга ёс - Монголын залуучуудын холбооны тэргүүн А.Энхболд, Нийгмийн гэмт халдлагаас урьдчилан сэргийлэх төвийн тэргүүн Б.Цэрэндорж нар өнөөдрөөс Хэлмэгдүүлэлтийн хөшөөний дэргэд хуурай өлсгөлөн зарлахаа албан ёсоор мэдэгдлээ. Өлсгөлөн зарлах хүмүүсийн тоо цаашид нэмэгдэж магадгүй байна.

МАХН-ын Чингэлтэй дүүргийн мянгатын дарга З.Баянсэлэнгэ:

  - Прокурорын газраам ингэж хойрго хандана гэдгийг гадарлаж байсан болохоор бид дараагийн арга хэмжээгээ иргэн хүнийхээ зүгээс  авъя гэсэн ийм шийдвэр гаргалаа. Н.Энхбаяр дарга өлсгөлөн зарлаад албан ёсоор зуу гаруй цаг өнгөрлөө. Түүний амь насыг энэ хүмүүс тоодоггүй юм бол бидний хэсэг нөхөд ч гэсэн адилхан энэ хүнтэй цуг амиа золиход бэлэн байна. Тийм учраас бид өнөөдөрөөс  эхлээд албан ёсоор өлсгөлөн зарлаж байгаагаа мэдэгдэж байна. Бид хуулийн байгууллага  хууль бус шийдвэрээ хүчингүй болго, Н.Энхбаярыг сулла гэсэн шаардлага тавьж байгаа. Гэхдээ энэ шийдвэрийг хүн болгон сайн дурын үндсэн дээр гаргаж байгаа. Миний хувьд МАХН-ын гишүүн гэдэг утгаараа биш, хоёр хүүхдийн ээж, Монгол улсын иргэний хувиар хуурай өлсгөлөн зарлаж байгаагаа мэдэгдэж байна. Н.Энхбаярыг батлан даалтанд гаргах өргөдөлд хариу өгөх шаардлага эхний ээлжинд тавина. Хэрэв хүлээж авахгүй бол хугацаагүй өлсгөлөн зарлана. Бид нарын эрүүл мэнд, амь настай холбоотой асуудал учир бид сэтгэлийн хөөрлөөр хандсангүй. Ер нь хуулийн байгууллагын шийдвэрийг удаан хүлээсэн. Н.Энхбаярын амь насыг нэгэнт хэрэгсдэггүй юм бол ард түмэн нь ямар үнэд хүрэхийг харъя.

Ардчилал, шударга ёс - Монголын залуучуудын холбооны тэргүүн А.Энхболд:

-  Сая бид ярилцаж байгаад гэнэт шийдлээ. Хүний амь нас ны асуудал цаг минутаар яригдаж байхад зүгээр сууж чадсангүй. Хууль бус үйл ажиллагаагаа зогсоохыг шаардаж би энэ хуурай өлсгөлөнд оролцохоо мэдэгдэж байна.

Нийгмийн гэмт халдлагаас урьдчилан сэргийлэх төвийн тэргүүн Б.Цэрэндорж

- Би ч бас шууд шийдвэр гаргалаа. Би хоёр хүүхдийн эцэг хүн. Гэхдээ миний амь нас хэрэгтэй болоод энэ хүнийг суллана гэвэл хамаагүй, би одоо ч өгөхөд бэлэн. Тийм болохоор одоо өлсгөлөнд оролцох гарын үсэг зурна.