ОХУ-ын Авлигатай тэмцэх сангийн ажилтан Георгий Албуров өнгөрсөн бямба гарагт Ерөнхийлөгч Владимир Путины Хар тэнгисийн эрэгт байрлах нууц харшийн зургийг олон нийтэд дэлгэжээ. Тэрээр “Геледнжих хотын ойролцоох нууц харшаа Владимир Путин офшор компанийн эд хөрөнгө хэмээн бүртгүүлсэн” гэж бичээд харшийн ерөнхий зургийг олны хүртээл болгосон байна.  

2010, 2012 онуудад ч Хар тэнгисийн эрэг дэх В.Путины нууц харшийн тухай хэвлэлүүд шуугиж байсан юм. Хамгийн анх Оросын бизнесмэн Сергей Колесников энэ тухай мэдээлж байжээ. Тэрээр 87 га газарт байршсан В.Путины харш нэг тэрбум амдолларын өртгөөр боссон бөгөөд манай барилгын компани 2009 он хүртэл уг төсөл дээр ажилласан хэмээн мэдээлсэн юм.

Тухайн үед нүсэр байгууламжийг В.Путины хувийн хэрэгцээнд зориулж олон нийтийн сангаас санхүүжүүлэн бариулсан хэмээн мэдээлсэн ч Ерөнхийлөгчийн хэвлэлийн төлөөлөгч Дмитрий Песков үгүйсгэсэн мэдэгдэл хийж байжээ. Харин энэ удаа Авлигатай тэмцэх сангийн ажилтны мэдээлэлд Оросын эрх баригчид ямар нэгэн хариу өгөөгүй байна.

Оросын ерөнхийлөгчийн нууц харш хэмээгдэж буй “нууц” байгууламжийн шинэ, хуучин зургуудыг хүргэе.

Г.Үжин