Өнөөдөр 15.00 цагаас Үндэсний мэдээллийн төвд “Амлалт нэхэх ард түмний холбоо”-ны 21 аймгийн төлөөллүүд хэвлэлийн бага хурал хийлээ. Хэвлэлийн хурлыг нээж Баянхонгор аймгаас ирсэн иргэн А.Одончимэг мэдэгдэл хийв. Тэрээр “2012-04-13-ны өглөө болсон үйл явдлыг хөдөө орон нутгийн ард түмэн маш их эмзэглэн хүлээж авсан. 2,7-хон сая хүнтэй Монгол улсын иргэд нэг нэгэндээ ингэж их өсөрхөж хандана гэж огт санаагүй. Тиймээс улс орон даяар Н.Энхбаярыг суллуулах хөдөлгөөнийг өрнүүлсэн. Одоогийн байдлаар Н.Энхбаярыг ард түмний батлан даалтад авах өргөдөлд 95272 хүн гарын үсэг зурж, 2803 ээж Н.Энхбаярыг сулла гэсэн захидлыг бидэнд ирүүлсэн. Монгол улсын гуравдах ерөнхийлөгчийг баривчилж хорьсон шалтгааныг бид сонин хэвлэлээс уншсан. Өргөө зочид буудлын хувьчлал, Улаанбаатар хэвлэлийн газрын хувьчлал гэдэг түүнд өөрт нь огт хамаагүй хэргээр буруутгаж байгаа гэсэн. Авлигын загалмайлсан эцэг цоллочихоод ийм зүйлээр буруутгадаг юм бол ард түмэн бид төрийн эрх барьж байгаа хүмүүсээс Бороо гоулдын татваргүйгээр олборлосон 40 тн алтыг нэхэж байна. Бидний эцэг эх сүүлийн 70 жилд хөлсөө урсган байж байгуулсан үйлдвэрүүдийг өмч хувьчлалаар хууль бусаар өөртөө авсан нөхдүүдээс үйлдвэрүүдээ нэхмээр байна. Хадгаламж банкны 14 тэрбумыг эрх баригчдаас нэхмээр байна. Монголын ард түмнийг хэдэн үеэр нь тэжээж тэтгэх Оюутолгой, Таван толгойгоо олгиархиудаас нэхмээр байна” гэв. Б.Золбоо
