Попын хаан Майкл Жексоныг бага насны хоёр хүүг хүчирхийлсэн болон 20 гаруй хүнийг хүчирхийлсэн хэргээ нууцлахын тулд 200 гаруй сая ам.долларыг хохирогсдод өгсөн гэх мэдээлэл барууны хэвлэлүүдэд цацагдаж эхэллээ. Энэхүү мэдээллийг хуульчид үнэн хэмээн нотлон хэлж байгаа юм.

Уг шуугиан Майкл Жексонд багадаа хүчирхийлүүлсэн хоёр залуу саяхан гомдол гаргасны дараа олон нийтэд дэлгэгдлээ. Хэрвээ тэд хохирогч гэдгээ шүүхээр батлуулж чадвал алдарт одын 1.5 тэрбум ам.долларын үл хөдлөх хөрөнгөөс нөхөн төлбөр авах эрхтэй болох аж.

Нэгэн цагт Майкл Жексоны үнэнч “хамгаалагч” явсан Австралийн бүжиг дэглээч Уэйд Робсон одоо түүнийг араатан байсан хэмээн олон нийтэд зарлаж, хүүхэд байхад нь хүчирхийлсэн хэмээн мэдээлсэн байна.

Жексонд хүчирхийлүүлсэн өөр нэгэн хохирогч болох Жэймс Сэйфчук, Уэйд Робсон нарын гомдлын дагуу Лос Анжелес хотын шүүх анхан шатны хуралдааныг маргааш явуулахаар төлөвлөөд байна.

        Гомдол гаргагч Жэймс Сэйфчук шүүхэд бичсэн мэдүүлэгтээ 1987 онд буюу найман настайдаа Жексонтой анх уулзсан бөгөөд түүнийг жилийн дараа хүчирхийлсэн гэжээ. Бүр тухайн үед Сэйфчукийг сүйт “бүсгүй”-гээ болгон нууц хурим хийсэн байна. Түүний мэдээлснээр Жексон хүүд гэрлэлтийн “гэрчилгээ” гарган өгч, хайраа тангарагласан гэв. Цаг хугацаа өнгөрөхийн хэрээр дуучин Сэйфчукийг үеэл хэмээн олон нийтийн дунд танилцуулан авч явдаг байсан бөгөөд энэ хугацаанд нийт 100 гаруй удаа хүчирхийлсэн гэжээ.  

Харин Робсон 15 настайдаа дуучинтай анх танилцсан бөгөөд 22 жилийн турш чимээгүй хүчирхийлүүлсний эцэст гомдол гаргасан гэжээ. Түүнийг анх эгч нь хэдхэн метрийн цаана өөр орон дээр унтаж байхад хүчирхийлсэн хэмээн мэдүүлжээ.

Жексоны гэрийн үйлчлэгч Бланка Франсиа ч мөн эзнийгээ есөн настай Робсонтой орондоо нүцгэн байхыг харсан хэмээн гэрчилжээ. Алдарт дуучин Бритни Спирс, Жастин Тимберлэйк нарын бүжгийн дэглэсэн Робсон попын хааны хүчирхийллийн улмаас ажлаа хийж чадахгүйд хүрсэн гэсэн байна.

Хамгийн ноцтой мэдэгдэл нь хуулийн баталгаат эх сурвалж буюу гомдол гаргагчдын өмгөөлөгч хавтаст нотолгоондоо олон удаа хүчирхийллийн хэрэг үйлдэж, үүнийгээ нуун дарагдуулж байсан тухай хавсаргажээ. Үүнд Майкл Жексоныг хүчирхийлсэн 20 хүнийхээ амийг барихын тулд 200 орчим сая ам.доллар өгсөн гэжээ.  

Жексоны шүтэн бишрэгчид түүнийг үнэхээр гаж донтон, хүчирхийлэгч этгээд байсан эсэхэд эргэлзэж байна. Энэхүү мэдээлэл барууны нийгмийн сүлжээнд ихээхэн шуугиан тарьж байгаа бөгөөд шүүх байгууллагын харин олон хүний эргэлзээг гаргана хэмээн найдаж байгаа юм.

Г.Үжин

www.24tsag.mn