Авлигатай Тэмцэх Газраас өчигдөр шөнө 24:00 цагийн үед Мonnis tower-т байрладаг South Gobi Sands компанийн оффисыг лацадсан бол өнөөдрөөс ажилчдынх нь 50 хувь сул зогсолт хийх гэж байгаа юм байна.
    Авлигатай Тэмцэх Газраас өчигдөр шөнө 24:00 цагийн үед Мonnis tower-т байрладаг South Gobi Sands компанийн оффисыг лацадсан бол өнөөдрөөс ажилчдынх нь 50 хувь сул зогсолт хийх гэж байгаа юм байна.  Мөн тус компанийн мэдэлд байж ирсэн Өмнөговь аймгийн Гурвантэс сумын нутаг дэвсгэрт орших Овооттолгойн уурхайн үйл ажиллагаа нь бүрэн зогссон, нүүрсний замыг нь хаачихсан байгааг эх сурвалжууд мэдээлж байна. Харин өнөөдөр “Саусгоби сэндс” компанийн “Моннис” цамхаг дахь байранд АТГ-аас нэгжлэг хийжээ. Тус компани цамхагийн аравдугаар давхарт байрладаг юм. Цамхагийн аравдугаар давхарт лифт зогсоохыг болиулж, шатаар тус давхар руу нэвтрэх хаалгыг түгжсэн байлаа. Түүнчлэн уг хэрэгт АМГ-ын дарга асан Д.Батхуягийг баривчлан, Төв аймаг дахь Урьдчилан хорих төвд саатуулжээ. Түүнийг “Саус гоби сэндс” компанийн асуудалтай холбоотой байж магадгүй хэмээн таамаглаж буй юм байна.
    Тэрбээр Хөвсгөл аймагт нэр дэвшихээр бэлтгэж байсан бөгөөд тус аймагт ажиллаж байхад нь АТГ-ынхан дуудаж, өчигдөр авчирсан байна.
    АМХЭГ-ын дарга асан Д.Батхуягийг урд нь лиценз зарсан, албан тушаалаа урвуулан ашигласан хэргээр АТГ-ынхан шалгаж байсан. Гэвч түүнийг ямар нэгэн гэм буруугүй хэмээн үзэж, хэргийг нь хэрэгсэхгүй болгоод байсан юм.
    Д.Батхуяг АМХЭГ-ын даргын ажлыг хүлээлгэж өгснөөсөө хойш Ерөнхий сайд С.Батболдын зөвлөхөөр томилогдон ажиллаж байжээ.