ӨМӨЗО-ны Найман хошуунд өргөн хүрээний жагсаал боллж нэг хүн амиа алдаж, олон арван хүн гэмтэж бэртсэн байна. Тус хошууны Даачин талд химийн есөн үйлдвэр байдаг бөгөөд агаар болон хөрсний бохирдолд хүргэж, хүн амын дунд өвчлөл газар авах болжээ. Тэр дундаа жирэмсэн эх хэвийн амаржиж чадалгүй зулбалт нэмэгдсэн тул нутгийн иргэд химийн бохирдлыг эсэргүүцэн жагсаал зохион байгуулсан юм.

Гурван долоо хоног үргэжлилсэн жагсаалыг өчигдөр хүчээр тараах үед жагсагчид цагдаа нартай мөргөлдсөнөөр нэг хүн амиа алджээ. Цагдаа нар уг ажиллагаандаа хөрш зэргэлдээх Улаан хад, Тунляо хотын цагдаа нарыг дайчилсан байна.

Жагсагчдыг нийт 2000 гаруй цагдаа цахилгаан бороохой, нулимс асгаруулагч хий хэрэглэж, даралттай усаар шүршиж тараажээ. Энэ үеэр нэг хүн амиа алдсан бөгөөд 170 хүн гэмтэж бэртсэн байна. Мөн 70 гаруй хүнийг баривчилсан хэмээн “South China morning post” мэдээлжээ.

ӨМӨЗО-ны Хүний эрхийг хамгаалах хорооны мэдээлснээр эсэргүүцлийн цуглаан болсон газарт интернэт болон гар утасны сүлжээг тасалж, зам харилцааг хаасан байна.

Г.Үжин