МАХН-ын дарга Н.Энхбаярыг суллахыг шаардаж тус намын таван хүн өнөөдрөөс хуурай өлсгөлөн зарлаж эхлээд байна. Тэд Түүхийн музейн урд байх Хэлмэгдэгсдийн хөшөөний урд суулт хийж байгаа юм. Харин дөнгөж сая Сүхбаатар дүүргийн цагдаагийн газраас хүмүүс ирж тэднийг тарахыг шаардаж, албан бичиг үзүүлжээ. Тэр албан бичигт өлсгөлөн зарлаад гарсан хохирлыг зохион байгуулж байгаа хүмүүс өөрсдөө хариуцахыг мэдэгдээд энэ хууль бус үйлдлээ зосгоо гэсэн шаардлага тавьсан байна. Харин тэнд байгаа МАХН-ын гишүүд “Хүн өөрийн үзэл бодлоо илэрхийлж өлсгөлөн зарлах нь хууль зөрчсөн үйлдэл биш. Тиймээс энэ шаардлага нь өөрөө хууль бус” гэж албан бичгийг аваагүй байна. Суулт зарлаж байгаа хүмүүсийг цагдаагийн ажилтан камераар бичиж байсан бөгөөд тэдний ойролцоо цагдаагийнхан эмх замбараагүй байдал үүсэхээс сэргийлж ажиглалт хийж байгаа юм. Өлсгөлөн зарласан хүмүүсийн хэлж байгаагаар нэгэнт албан бичгийг нь аваагүй тул хүний хөл татрах үеэр албадан тараах байх гэж хэлж байлаа.