Өдгөө 100 настай Японы иргэн Миеко Нагаоко дээд амжилт тогтоон Гиннессийн номонд бүргэгдэх нөхцлийг хангасан байна.

Тэрээр 1500 метрийн чөлөөт сэлэлтийн төрөлд нэг цаг 15 минут, 54 секундэд сэлж чадсан хамгийн өндөр настай тамирчин болж байгаа юм. Миеко Нагаоко шиг 100 насандаа энэ төрлийг давж чадсан хүн дэлхийд нэг ч байхгүй хэмээн дээд амжилт бүртгэгчид бахархан ярьжээ.

Миеко Нагаоко 82 насандаа өвдгөндөө гэмтэл авсны дараа усан сэлэлтээр хичээллэж хоёр жилийн дараа усан спортын мастер болжээ. Харин 88 насандаа дэлхийн аваргын хүрэл медаль хүртсэн байна.

Эмээ боллоо, бие дордлоо хэмээн гэртээ суугаагүй тэрээр өмнө нь чөлөөт сэлэлтийн олон төрлийн зайнд болон араар сэлэлтийн рекордыг эзэмшдэг.

Тэрээр “Киодо" агентлагт өгсөн ярилцлагадаа “Хэрэв би урт удаан насалж чадвал 105 нас хүртлээ сэлэх болно” хэмээн ярьжээ.

Япон улс нь дэлхийд хамгийн олон өндөр настантай гэдгээрээ тэргүүлдэг. Тус улсад 100-аас дээш настай 59 мянга гаруй иргэн амьдардаг байна. Мөн өнгөрсөн долоо хоногт дэлхийн хамгийн өндөр настай хэмээн цоллогдож байсан японы иргэн 117 настай Мисао Окава хорвоогийн мөнх бусыг үзүүлсэн билээ.

Г.Үжин

www.24tsag.mn