Дорнод аймагт гарсан гал түймрийг унтраахаар ажиллаж байсан ОБЕГ-ын таван ажилтны гурав нь амь насаа алджээ. Энэ талаар ОБЕГ-ын хэвлэлийн ажилтнаас тодруулахад “Тийм хэрэг гарсан нь үнэн. Гэхдээ тодорхой мэдээлэл ирээгүй байгаа” гэв. Өнгөрсөн сарын 19-ний өдөр Дорнод аймгийн Халхгол сумын нутаг “Вангийн цагаан уул” гэдэг газар онц их хэмжээний хээрийн түймэр гарчээ. Мөн өнгөрсөн сарын 22-ны өдөр Дорнод аймгийн Чойбалсан сумын нутаг, “Хавирга өртөө”-ний орчимд гарсан хээрийн түймэр богино хугацаанд Гурванзагал сумын Цагаанчулуут, Улаанхонхор, Баянбулаг, Их булаг, Дашбалбар сумын Илтрүүт, Шарвай, Нарсан толгой, Дэл өндөр, Мардай, Улз гол, Чулуунхороот сумын Авдар толгой, Бүс нуур, Эрээнцав, Халхгол сумын Хар хоньтын застав зэрэг газруудаар тархсан байна. Энэхүү том хэмжээний түймрийг бүрэн унтраахаар ажиллаж байсан онцгой байдлын ажилтнууд ийнхүү амиа алдсан байна.
Тэдний амиа алдсан талаар мэдээллийг ОБЕГ-аас албан ёсоор хэвлэлийн бага хурал зарлаж мэдэгдэнэ гэлээ.
Б.Чимэг
