Хэт даврагч зэвсэгт бүлэглэл “Исламын улс” язиди шашинтай 200 гаруй хүнийг сулласан тухай “BBC” мэдээллээ. Тэд барьцаалсан хүмүүсээ Иракын хойд хэсэгт байршуулж байсан аж.

Террористуудын гараас мултарсан 216 “хоригдол”-ын биеийн байдал ихээхэн муу байсан байна. Мөн хүн бүрт ямар нэгэн байдлаар хүчирхийлэлд өртсөн гэх шинж тэмдэг харагдаж байлаа хэмээн Иракын Генерал Хива Абдулла ярьсан байна.

Суллагдсан хүмүүсийн 40 нь хүүхдүүд байсан бол үлдсэн нь настай хүмүүс байжээ. Үйлд явдлыг газар дээрээс нь сурвалжилсэн сэтгүүлчийн мэдээлснээр суллагдагсад маш их ядарч сульдсан байсан бөгөөд хүний асуултыг зарим нь ойлгойхгүй, зарим нь харилж чадахгүйд хүртлээ туйлджээ.

Барьцаанд байсан хүмүүс өөрсдийг нь Тел Афар хот дахь “Исалмын улс”-ын түшиц газарт байлгаж байсан хэмээн ярьжээ. Харин суллахаас хэд хоногийн өмнө олон тосгон дамжуулан авч явсан гэсэн байна.

“Исламын улс” бүлэглэл Иракын язиди иргэд рүү өнгөрсөн жил дайрч олон мянган хүнийг хөнөөж, олон зуун хүнийг барьцаалан авсан юм. Өнгөрсөн оны наймдугаар сард олзолсон хүмүүсийг ийм олноор яагаад суллах болсон тухайгаа “Исламын улс” мэдэгдээгүй байна.
Тэд хүмүүсийг Иракын цэргийн хүчний хяналтад байгаа Нивенех аймгийн хил хүргэлгүй буулгасан бөгөөд суллагдагсдыг цэргүүд автобус, түргэний машинаар эмнэлэгт хүргэжээ.

Харин энэ үеэр Иракын цэргүүд баруун хэсэгт орших Анбар хотод Исламын улсынхны эсрэг тулалдаж байгаа юм.

Язидичууд гэж хэн бэ?

Энэ бол исламын хэт даврагсад ойрын хугацаанд язидичуудыг суллаж байгаа хоёр дахь тохиолдол юм. Тэд өнгөрсөн нэгдүгээр сард мөн ихэнх нь өвчтэй хүүхдээс бүрдсэн олон зуун язиди хүмүүсийг сулласан билээ.

Язиди шашинтнууд нь синкретизм үзэлтэй курд үндэстэн хүмүүс юм. Ирак, Сири, Кавказад олноор оршин суудаг. Дэлхий дээр 500 мянга гаруй язидичууд амьдардаг бөгөөд ихэнх нь Иракын Нивенех аймагт суурьшжээ.  

Язидичууд нь зороастрианизм гэх мэт итгэл үнэмшлийн олон элементийг багтаадаг шашны цөөнхийн урсгал юм. Исламын шашны олон бүлэг, урсгалууд язидичуудыг муу ёрын сүсэгтнүүд хэмээн хардаг. Язиди нарын уламжлалт шүтлэгийг исламчууд “чөтгөр, шулмын номлол” гэж үздэг бөгөөд хэт даврагчид тэднийг ислам шашинд орохгүй бол үхэх ёстой хэмээн үздэг байна.
“Исламын улс”-аас өмнө 2007 оны наймдугаар сард Нивенех аймгийн язидичуудын тосгодод жихадууд халдаж 700-аад хүийг хөнөөж байсан түүхтэй.

Г.Үжин

www.24tsag.mn