Норвеги улс цыгануудаас уучлал гуйж, нөхөн төлбөр олгохоор болсон тухай “Guardian” агентлаг мэдээллээ.

Тус улсын Ерөнхий сайд Эрна Солберг энэ тухай мэдээлэхдээ “Дэлхийн хоёрдугаар дайны үед манай улсад цыгануудыг хавчин гадуурхаж байсан. Энэ бол манай түүхийн хар хуудсын нэг” хэмээн хэлжээ. Тэрээр хар түүхийн төлөө цыгануудаас уучлал гуйсан бөгөөд үүнийхээ төлөө нөхөн төлбөр төлөхөө мэдэгдсэн байна.

1930-аад онд Норвегийн цыгануудыг хилээр гарч явсныхаа дараа эргэн ирэхийг нь хориглосон тухай илтгэлийг тус улсын Засгийн газар өнгөрсөн хоёрдугаар сард хэлэлцсэн юм. Тэр үед ийм шийдвэр гаргаснаар 100-150 хүн Норвегидоо эргэн ирж чадалгүй нацистын бөөнөөр хорих лагерьт амь үрэгдсэн аж. Дайны дараа ч гэсэн нацистын бөөнөөр хорих лагерьт байсан цыгануудыг Норвегид ирэхийг арваад жил хориглож байжээ. Одоо норвегид ийм зовлон амссан цыганы тоо 500 орчим байгаа гэлээ.

Г.Үжин