АНУ-ын Төрийн нарийн бичгийн дарга асан Хилари Клинтон 2016 оны Ерөнхийлөгчийн сонгуульд өрсөлдөхөө албан ёсоор мэдэгдлээ. Тэрээр өчигдөр сонгуулийн кампанит ажлынхаа албан ёсны веб сайтыг нээжээ.
Веб сайтдаа байршуулсан бичлэгтээ хатагтай Клинтон “Би ерөнхийлөгчийн сонгуульд өрсөлдөнө. Америкчууд эдийн засгийн хүнд байдалтай тэмцсэн. Гэвч эрх барьж буй хүмүүсийн ачаар тэрхүү тэмцэл гацчихаад байна. Америк хүн бүрт тэмцэгч хэрэгтэй. Би тэр тэмцэгч нь болмоор байна” гэж хэлжээ. Хилари Клинтон 2008 онд Ерөнхийлөгчийн сонгуульд өрсөлдсөн боловч Барак Обамад ялагдсан юм.
Тэрээр бичлэгтээ Америкчуудын итгэл, эрмэлзлэлийн тухай онцолсон бөгөөд төгсгөлд нь “Би таны саналыг авах замд орсон. Таны цаг ирсэн тул надтай энэхүү аялалд нэгдэнэ хэмээн найдаж байна” гэжээ.
Хатагтай Клинтоны багийнхан даваа гаргаас эхлэн Ардчилсан намын дэмжигчид олонтой муж улсуудад ажиллаж эхлэх аж. Гэвч сонгуулийн албан ёсны сурталчилгааны ажлаа ирэх тавдугаар сарын дундуур эхлүүлэх юм байна.
Тэр гол тоглогч болж чадах уу?
Хилари Клинтон Ерөнхийлөгчийн сонгуульд нэр дэвшсэн ч түүнийг гол тоглогч болж чадахгүй хэмээн зарим ажиглагчид бичжээ. Улс төрд Хилари Клинтон хэмээх нэр хүчтэй том нэр боловч “хөндийрсөн” газраа өөрийгөө дахин бүтээнэ гэдэг амаргүй хэрэг хэмээн мэргэжилтнүүд дүгнэжээ. Учир нь тэрээр улс төрд нэг намын Ерөнхийлөгч Барак Обамаг дэмждэг. Үүнийгээ ч өнгөрсөн бямба гарагт Панамад болсон Америкчуудын чуулга уулзалт дээр баталж, “Барак Обама бол гайхамшигтай ерөнхийлөгч” хэмээн хэлсэн. Тэгвэл түүний Обамагаас ялгарах гол бодлого, давуу тал тодорхойгүй байна гэжээ.
Хатагтай Клинтон сонгуульд гарч ирэх ямар ч хатуу өрсөлдөөнтэй нүүр тулахад өөрийгөө бэлдсэн нь ойлгомжтой. Гэвч Бүгд Найрамдах намынхан түүний эсрэг дайралтуудыг өргөнөөр хийх болно. Нөгөө талаас энэ нь түүнд амаргүй байна гэжээ. Бүгд найрамдахчууд аль хэдийн дайралтаа эхэлчихсэн хэмээн үзэж байна. Тухайлбал, тус намаас Ерөнхийлөгчийн сонгуульд нэр дэвшигч Рэнд Пол хатагтай Клинтоныг 2012 оны есдүгээр сард Ливийн Бенгази хотод Америкийн дипломатуудад халдан хөнөөсөн хэрэгт хариуцлага хүлээх ёстой хэмээн буруутгасан. Мөн Флорида мужийн захирагч, Жорж Бушийн дүү, Бүгд найрамдах намаас ерөнхийлөгчийн сонгуульд нэр дэвшинэ хэмээн яригдаж буй Жеб Буш “Бид Хиларигаас дээр зүйл хийх ёстой” хэмээн жиргэжээ. Энэ мэтчилэн тоглоом эхлээчгүй байхад эхэлчихэсэн хатуу дайралтуудыг Хилари Клинтон давж чадах эсэхийг цаг хугацаа харуулна.
Хилари Клинтоны засгийн газар дахь карьерийн дээшээ доошоо
• Нөхөр Билл Клинтон нь 1993-1997 онд Ерөнхийлөгчөөр ажиллах үед АНУ-ын эрүүл мэндийн системийг шинэчлэхийг оролдсон
• 1997-1998 онд Билл Клинтон Цагаан ордны ажилтан Моника Левинскитэй явалддаг нь олон нийтэд ил болсон ч давж гарч чадсан
• 2000 онд Нью-Йорк хотод Ардчилсан намаас Сенатчаар сонгогдсон
• 2003 онд Иракын дайнд саналаа өгсөн ч хожим нь өөрийгөө дайнаас хол хэмээн зарласан
• 2008 онд Ардчилсан намаас Ерөнхийлөгчийн сонгуульд нэр дэвшсэн ч Барак Обамад ялагдсан
• 2009-2013 онд АНУ-ын Төрийн нарийн бичгийн даргаар ажилласан
• 2012 онд Ливийн Бенгази хотод АНУ-ын дипломатууд халдлагад өртсөн хэрэгт Төрийн нарийн бичгийн даргын хувиар буруутгагддаг
• 2015 онд Төрийн Департмент хувийн мэйл хаягаа ашигласан албан ажилд ашигласан хэргээр шалгасан
Г.Үжин
