АНУ-ын Ерөнхийлөгч Барак Обамагийн орлого өнгөрсөн онд ихээр буурсан тухай Цагаан ордон мэдээллээ. Ерөнхийлөгч Барак Обама болон тэргүүн хатагтай Мишель Обама нар 2014 онд 477.383 ам.долларын орлого олсон хэмээн татварын мэдүүлэгтээ тайлагнасан байна.

Хосууд 2012 онд 662.076, 2013 онд 503.183 ам.долларын орлоготой байсан тул жилээс жилд орлого олох нь буурч байна хэмээн дүгнэж болох юм.

Ерөнхийлөгч Б.Обамагийн жилийн цалин 400 мянган ам.доллар бөгөөд үүн дээр гадаад орлого  болох түүний намтар зэргийг багтаасан номын орлого тооцогдсон байна. Мөн хилийн чанадын орлого 43.722 ам.доллар нэмэгдэж дээрх тоо гарчээ.

Цагаан ордон хилийн чанадын орлогын эх үүсвэрийг олон нийтэд цацахаас татгалзсан байна.

Барак Обама өнгөрсөн жилд нийт 93.362 ам.долларын татвар төлсөн байна. Мөн орлогоосоо 70.7 мянган ам.долларыг буяны үйлст зарцуулсан аж. Тодруулбал, Америкийн цэргийн албан хаагчид, тэдний гэр бүлийнхэнд эмнэлгийн тусламж үзүүлдэг “Fisher House” санд тэд 20 мянган ам долларын хандив өргөсөн байна.

Ерөнхийлөгч Барак Обама өнгөрсөн онд анх Америкийн ерөнхийлөгч болж байсан жилийнхээс тав дахин бага орлого олсон аж.

Харин АНУ-ын дэд ерөнхийлөгч Жозеф Байдан түүний эхнэр Жилл хоёр өнгөрсөн онд 388.8 мянган ам.долларын орлоготой ажилласан гэж хөрөнгө орлогын мэдүүлэгтээ бичсэн байна. Холбооны татварт тэд 90.5 мянган ам доллар төлсөн бол буяны санд 7.3 мянган доллар зарцуулжээ.

Г.Үжин