“Fast & Furious” киноны долоо дахь цуврал хэдхэн хоногийн өмнө нээлтээ хийж ашиг орлогоороо тэргүүлж байгаа. Харамсалтай нь уйдах завгүй гайхалтай хормуудаар дүүрсэн уг киног дуурайх гэж байгаад ноцтой осол гаргасан хэрэг Хятадын нийслэлд болжээ.

“Сяньхуа” агентлагийн мэдээлснээр Бээжингийн Үндэсний цэнгэлдэх хүрээлэнгийн ойролцоох тунельд тансаг зэрэглэлийн хоёр машин мөргөлдсөн аймшигт осол  гарчээ. Осол бямба гаргийн 22:00 цагийн орчимд гарсан бөгөөд спорт загварын “Lamborghini” болон “Ferrari” машинууд маш хурдтайгаар давхиж яваад осолдсон байна.

Цагдаагийн эх сурвалжийн мэдээлснээр тансаг зэрэглэлийн машинуудыг 20, 21  настай хоёр залуу жолоодож явжээ. Тэднийг 160 км цагийн хурдтай явж байсан хэмээн үзэж байна. Мөн тэдэнтэй хамт хоёр эмэгтэй зорчигч явж байсан бөгөөд нэг нь нүцгэн байсан гэлээ.

Дүрэм зөрчигчдөөс одоогоор хэн нэгнийг баривчлаагүй бөгөөд хэргийг шалгаж байгаа юм байна. Эхний ээлжинд жолооч нар өгсөн мэдүүлэгтээ “Fast & Furious 7” киног дуурайх гэсэн хэмээн ярьсан байна. Мөн жолооч нарын нэрийг олон нийтэд мэдээлэхгүй нууцалж байгааг өндөр албан тушаалтны хүүхдүүд байсан байж мэдэх юм хэмээн Хятадын хэвлэлүүд бичжээ.

Осол гаргагчдаас амь үрэгдсэн хүн байхгүй ч нэгнийх нь биеийн байдал хүнд нөхцөлд байгаа аж.

Lamborghini машин нь Хятадад 800 мянга, Ferrari 500 мянган ам.долларын үнэтэй байдаг гэжээ. 

Г.Үжин