Өнөөдөр 12.00 цагаас МАХН-ын төв байр цагаан ордонд МУ-ын хөдөлмөрийн баатар Б.Гүнжидлхам, СГЗ Б.Рагчаа, алдарт эх Ж.Навчаа, З.Нэргүй, Г.Чулуундорж нар мэдээлэл хийлээ. СГЗ Б.Рагчаа “Олон хоногийн туршид эхчүүд бид сэтгэлийн их хямралтай байх боллоо. Эмч хүн дайснаа ч гэсэн эмчилнэ гэж тангараг өргөдөг шиг эхчүүд бид ээжийн цагаан сүүг хөхөж өссөн хүн бүхнийг хайрладаг. МАХН-ын дарга Н.Энхбаярыг хүний ёсноос гадуур зэрлэг балмадаар баривчилахыг үзээд сэтгэл ихэд эмзэглэсэн. 1937 оны их цуст хэлмэгдүүлэлт орчин цагт Н.Энхбаяр даргыг баривчилснаар эхэлж байна уу гэж би айж байна. Ц.Элбэгдорж ерөнхийлөгч 2009 онд ээжийгээ тэвэрч уйлаад мөргөж байхыг нь хараад эхчүүд бид тэр хүнийг сонгож байсан. Гэтэл энэ хүн цөөхөн хэдэн Монголчуудаа хагаралдуулж барьж хорьж байгааг хорьж байгааг хараад сэтгэл их өмөрлөө” гэв.
Үүний дараа МУ-ын хөдөлмөрийн баатар алдарт эх Б.Гүнжидлхам “Нотлогдоогүй хэргээр МУ-ын ерөнхийлөгч байсан хүнийг барьж хориулсныг хараад би Ц.Элбэгдорж ерөнхийлөгчид үнэхээр их гомдлоо. Та яагаад ийм харгис хэрцгий үйлдэл хийгээд байгаа юм бэ? Яагаад харгислалаа өнөө мөн зогсоохгүй байгаа юм бэ” гэлээ.
Мөн алдарт ээжүүд бид Ц.Элбэгдорж ерөнхийлөгчөөсөө Н.Энхбаярыг яаралтай суллаач ээ хэмээн гуйж байна гэдгээ хурлын үеэр дуулгалаа.
Б.Золбоо
