АНУ-ын Ерөнхийлөгч Барак Обама Кубатай дипломат харилцаагаа сэргээсний хүрээнд тодорхой алхмуудыг хийж эхэлсэн тухай “BBC” мэдээллээ. Цагаан ордны мэдээлснээр Барак Обама Куба улсыг АНУ-ын Терроризмыг спонсорлогч улс орнуудын жагсаалтаас хасахаар болсон байна.
Ингэснээр Цагаан ордон Кубыг Испанийн Баскийн салан тусгаарлагч “ETA” бүлэглэл, Колумбын зэвсэгт бүлэглэл “Фарк” мэтийн босогчдыг дэмждэггүй хэмээн харж буйгаа илэрхийлж байгаа юм. Нөгөө талаас энэхүү шийдвэрийг олон улсын ажиглагчид “Олон арван жил хөндийрсөн харилцааг гэсгээхийн тулд АНУ-ын хийж болох хамгийн бодит алхам боллоо” хэмээн дүгнэж байна.
Барак Обама шийдвэрийнхээ тухай мэдэгдэхдээ “Кубын засгийн газар сүүлийн зургаан сарын хугацаанд ямар нэгэн олон улсын терроризмыг дэмжсэн шийдвэр гаргаагүй. Мөн ирээдүйд терроризмыг дэмжихгүй гэх баталгаагаар ч хангасан” хэмээн ярьжээ.
Куба, АНУ өнгөрсөн 12 дугаар сард дипломат харилцаагаа сэргээхээр болсон билээ. Гэвч хэдий Кубыг террорист орны жагсаалтаас хассан ч тус улсад тавьсан худалдааны хоригуудаа хэвээр үлдээсэн байна. Худалдааны хоригийг цуцлах тухай шийдвэрийг дан ганц Барак Обама бус АНУ-ын Конгресс хэлээлцэж шийдвэрлэх байх гэсэн хүлээлт байгаа аж.
АНУ 1982 онд Кубыг терроризмыг хар жагсаалдаа оруулсан юм.
Кубын Ерөнхийлөгч Фидель Кастро болон АНУ-ын Дэд Ерөнхийлөгч Ричард Никсон нар 1959 онд Вашингтонд уулзав.
Кубын 1959 оны хувьсгалаас хойш АНУ-Кубын харилцааны гол үйл явдлууд:
• 1960 он: АНУ Кубээс дипломат харилцаагаа тасалж, худалдааны хориг тавив.
• 1961 он: АНУ Кубад өрнөсөн “Bay of Pigs” халдлагыг дэмжсэн боловч бүтэлгүйтсэн. Фидель Кастро Кубыг коммнуист улс хэмээн зарлаж, ЗСБНХУ-тай хамтрах болов.
• 1962 он: Кастро ЗСБНХУ-ыг Кубад цөмийн пуужингаа байршуулахыг зөвшөөрөв.
• 1980 он: Кубын 125 мянга орчим хүн АНУ-д цагаачлахыг хүссэн боловч Кастро хориг тавив.
• 1993 он: АНУ хоригоо чангатгаж, ЗХУ-тай хамтарснаас болж Кубын эдийн засаг унасан хэмээн ухуулж байв.
• 1999 он: Элиан Гонзалез нэрт куба хүүг ааваасаа зөрж цагаачдын завинд суун хамаатнуудынхаа хамт АНУ-ын Флорида мужид очжээ. Гэвч хоёр тал хүүг буцаах буцаахгүй талаар олон шүүхийн шийдвэр гаргаж талцав.
• 2002 он: АНУ Кубыг “чөтгөрийн тэнхлэг” жагсаалтад нэмжээ.
• 2014 он: АНУ-Куба дипломат харилцаагаа сэргээхээ зарлав.
Г.Үжин
