Ашигт малтмалын газрын даргаар ажиллаж байсан Ц.Батхуягийг авлигын хэргээр шалгаж, урьдчилан хорих төвд саатуулаад байгаа. Түүнийг АМГ-ын даргаар ажиллаж байхдаа авлигал авч, хууль бус лицензийн наймаа хийсэн байх магадлалтай хэмээн шалгаж байгаа юм. Ц.Батхуяг өмнө нь  ч ийм асуудлаар шалгагдаж байсан. Хамгийн их лобби ордог, хамгийн их “хаялгатай” гэгддэг АМГ-т орсон цагаасаа нь эхлээд түүнийг хар, хор дагаж эхэлсэн тухай хүмүүс ярьдаг.

    Ц.Батхуяг гэж хэн бэ?
   Түүний АМГ-ын дарга болохоос өмнөх намтар, түүхийн мэдээлэл ховор аж. Тэрбээр энэ албан тушаалд очихоосоо өмнө “Тэс Трэйд” компаний захирлаар ажиллаж байсан.  Ц.Батхуягийн 2012 оны хөрөнгө орлогын мэдүүлгээс харахад тэрбээр агентлагийн дарга нараас хамгийн их бэлтэй, жилийн 115 сая төгрөгийн орлогтой аж. Мөн нэр дээр нь “Хөвсгөл алтан дуулга”, “МКМ”, “Ашихай” зэрэг компаниуд байна. Шаггүй уяач, морины хорхойтон гэдгээр нь хүрээнийхэн нь андахгүй.
    Харин улс төрийн үүх, түүхийн хувьд Хөвсгөл аймгийн уугуул түүнийг УИХ-ын гишүүн С.Баяр хөтлөж тус газрын дарга болгожээ. Тиймээс ч Ц.Батхуягийн нэрийн араас байнга “С.Баярын хүн” гэсэн дагавар үг дагалдаж байдаг. Тэрбээр 2012 онд УИХ-ын сонгуульд нэр дэвшихээр шийдсэн тул сонгуулийн хуулийн шинэ заалтын дагуу энэ оны эхээр АМГ-ын даргын албан тушаалаа өгсөн.     Гэсэн ч тэрбээр Хөвсгөлд нэр дэвших бэлтгэлээ нэлээн сайн хангасан бөгөөд “Эрсдэлтэй алхам хийсэн гэдгээ ойлгож байгаа. Ашигт малтмалын газрын даргын ажлаа өгснийг хүмүүс эрсдэл гэж хараад байна. Надад бол тийм биш. Хөвсгөлд хэдэн жилийн өмнө Монгол ардын намаас нэр дэвших хүн олддоггүй байлаа. Харин өнөөдөр манай тойрогт өрсөлдөх сонирхолтой олон хүн болсон. Төр түмний төлөө гэсэн хүн олоширч байгаа нь сайн хэрэг. Миний хувьд ямар нэгэн айдас алга” гэж тун итгэлтэй ярьж байжээ. Учир нь тэр АМГ-ын даргын ажлаа өгөөд ерөнхий сайд С.Батболдын ивээлд багтаж, орон тооны бус зөвлөх болсон юм. Хөвсгөлд эзэн суухын даваан дээр түүний өмнөх хэргүүд нь АТГ-т шалгуулахаар хойш чангаагаагүй байсан бол тэрбээр УИХ-д гарах багагүй магадлалтай байсан.

    192 лицензийн хэргийг нь сэргээн шалгаж магадгүй
   Энэ долоо хоногт АТГ Ц.Батхуягийг баривчилсныхаа дараа АТГ Өмнөговийн Овоот толгойн ордыг эзэмшдэг “Саус гоби сэндс” компанийг шалгаж байна. “Саус гоби сэндс”-ийн удирдлагууд Ц.Батхуягийн авлигал авсан хэрэгт холбоотой байхыг үгүйсгэхгүй гэж АТГ-ын Тамгын газрын дарга Г.Өнөрбаяр өчигдөр ярьсан юм. Өмнө нь АМГ-ын даргаар ажиллаж байх үед нь түүнийг хууль бусаар 192 лиценз олгосон гэж шалгаж байсан ч хэрэгсэхгүй болгосон. Гэхдээ "Нэгэнт шүүхээр шийдүүлж, гэм буруугүй гэж тогтоогоогүй тул шинэ баримт гарч ирвэл дээрх 192 лицензийн хэргийг дахин сэргээх магадлалтай" байгааг АТГ-ынхан мөн хэлсэн юм. Хэрэв түүнд эрүүгийн хэрэг үүсгэчихвэл Ц.Батхуяг АМГ-ын дарга ч үгүй, УИХ-ын гишүүний суудал ч үгүй үлдэх болоод байна. АТГ түүнтэй холбоотойгоор том том уул уурхайн компаниудыг шалгаж эхэлснийг бодоход базаахгүй баримтууд олон байгаа бололтой.