Өнгөрсөн нэгдүгээр сард АНУ-ын иргэн Жон Мартин Кийн гэгч иргэн манай улсад ирээд сураггүй болсон талаар манай сайт мэдээлсэн. Мөн түүний цогцсыг Төв аймгийн Эрдэнэ сумын нутаг, Цонжин болдгийн орчмоос олсон, хэрэгт 24 настай эмэгтэй сэжиглэгдэж байгаа, Жон Мартин Кийны аавдаа бичсэн захидал гээд уг хэрэгтэй холбоотой бүх мэдээллийг цаг тухайд нь хүргэсээр ирсэн. Түүнчлэн Жон Мартин Кийны эхнэр Нэнситэй хийсэн ярилцлагыг нийтэлсэн билээ. Харин саяхан уг хэрэгт Ч.Баттуулын хоёр найз Н.Мөнгөнчимэг, Н.Батнасан нарыг саатуулжээ. Тэд цагдаад “Баттуул хүн алчихлаа. Цогцсыг нь шатаах гэсэн юм. Хамт явах уу гээд гуйгаад байхаар нь бид цогцсыг шатаахад тусалсан. Тэр үед найзыгаа өрөвдөөд л ийм зүйл болчихлоо. Бид хүн алаагүй хэмээн мэдүүлсэн байна”. Өмнө нь түүний хэрэгт Ч.Баттуулын ах, найз залуу хоёрыг саатуулан шалгаж байсан ч хэрэг үйлдсэн нь нотлогдоогүй учир сулласан юм.
Хэргийг сануулбал, өнгөрсөн нэгдүгээр сарын 5-ны өдөр манай улсын хилээр орж ирсэн Америк иргэн Жон Мартин ор сураггүй алга боллоо, эрэн сурвалжилж өгнө үү гэсэн албан бичиг ЦЕГ-т иржээ. Цагдаагийн байгууллага яаралтай эрэн сурвалжилж хохирогчийн цогцсыг Төв аймгийн Эрдэнэ сумын нутаг, Цонжин болдгийн орчмоос олсон байна.
Хэрэгт 24 настай эмэгтэй Ч.Баттуул гэгчийг сэжиглэж байгаа бөгөөд тэрээр мөрдөн байцаалтын явцад “Жон Мартиныг ирсэн өдрийнх нь маргааш буюу нэгдүгээр сарын 6-ны өдөр хөнөөсөн. Зургаан удаа буудсан. Түүнийг Эрдэнэ сумын нутагт аваачиж амь насыг нь бүрэлгээд хэргээ нуухын тулд цогцсыг нь булсан” хэмээх мэдүүлгийг өгөөд байгаа аж.
Уг хэргийн мөрдөн байцаалтын ажиллагаа дууссан ба удахгүй прокурорт шилжүүлэхээр болсон байна.
Энэ хэргийн талаарх өмнөх мэдээллийг холбоотой мэдээ дээр дарж үзнэ үү.
