Өнөөдрийн УИХ-ын нэгдсэн чуулганы эхэнд УИХ-ын гишүүн, МАХН-ын дэд дарга Д.Тэрбишдагва МАХН-ын дарга Н.Энхбаярын биеийн байдлын талаар мэдээлэл өгч, энэ талаар байр сууриа илэрхийлэхийг УИХ-ын дарга Д.Дэмбэрэлээс хүслээ. Тэрбээр “Н.Энхбаярын биеийн байдал цаг тутам муудаж, өөрийх нь амь насыг торгоож байсан зүрхнийхээ эмийг өнөө өглөөнөөс уухаа зогсоохоор шийдлээ. Монгол улсын хууль хүчний байгууллагуудад энэ талаар мэдээлэл өгч, тодорхой санал хүргүүлсэн ч авч хэлэлцэхгүй байна. ҮАБЗ-ын гурван гишүүн ерөнхийлөгч, ерөнхий сайд, УИХ-ын дарга ч тоймтой хариу өгөхгүй байна. Амь нас нь хутганы ир дээр байгаа энэ нөхцөл уулзах санал тавьсан ч хүлээж авсангүй. Харин өчигдөр ерөнхий сайд С.Батболдтой товч уулзлаа” гэв. Мөн "Байдал хүнд байхад энэ хурлын танхимд бид бөөнөөрөө сууж байна. Н.Энхбаяраар удирдуулж, цуг сууж байсан хүмүүс харсаар байж ингэж амь насыг нь бүрэлгэчих юм уу?” гэж танхимд суусан гишүүдээс асуув. Тэгмэгц УИХ-ын чуулганд эмх замбараагүй байдал үүсч, Э.Бат-Үүл, Д.Тэрбишдагва нарын гишүүд ширүүн маргалдсан ч микрофоноо хаасан байсан тул тодорхой сонсогдоогүй юм.
Харин УИХ-ын дарга Д.Дэмбэрэл хариуд нь “Надад хэд хэдэн удаа бичиг өгсөн нь үнэн. Би одоо өөрийн байр сууриа илэрхийлье. Бүх зүйл хуулийн дагуу явах ёстой. Эрүүл мэндийн асуудлыг НББСШУ-ны байнгын хороо, хуулийн талын асуудлыг Хууль зүйн байнгын хороо шийдээд явах байх” гэлээ.
