Өнөөдөр 12.00 цагт Төрийн ордны Г танхимд УИХ-ын гишүүн Д.Тэрбишдагва, Ч.Улаан нар МАХН-ын дарга Н.Энхбаярын биеийн байдлын талаар сэтгүүлчдэд мэдээлэл хийв.Хурлын эхэнд УИХ-ын гишүүн Д.Тэрбишдагва, “Н.Энхбаяр дарга өлсгөлөн зарлах болсон шаардлагаа хууль хүчний байгууллага болон төрийн өндөрлөгүүдэд хүргэсэн. Улс төрийн өлсгөлөн зарлах нь сонголтын асуудал. Харин улс төрийн шаардлага тавихад нь тодорхой хэмжээгээр ярилцах хэрэгтэй. Гэтэл өнөөдрийг хүртэл төрийн гурван өндөрлөг энэ чиглэлээр ярилцахгүй байна. Зөвхөн “Эрүүл мэндэд нь анхаараарай” гэсэн асуудлыг хэлж ярьж байгаа. Нэгэнтээ өлсгөлөн зарлаж байгаа хүн тавьсан шаардлагынхаа дагуу хариу авахгүй бол үргэлжлүүлсээр байна” гэв.
Харин УИХ-ын гишүүн Ч.Улаан гишүүн “Өчигдөр үдээс хойш Н.Энхбаяр даргыг эмнэлэгт хүргэснээс хойш эмнэлгийн дотоод горим, үйл ажиллагааны зарчим эрс өөрчлөгдлөө. Н.Энхбаяр даргыг тусгай тасагт хэвтүүлж байгаа. Тусгай тасаг бол эмнэлгийн гуравдугаар давхарт байрладаг. Хонгилоор тусгаарлагдсан зохион байгуулалттай. Тэнд хорио тогтоосон байгаа. Мөн эмнэлгийн гадна доторгүй цагдаа нар жижүүрлэн хонож байна. Эмч нар нь өвчтөнд очиж үйлчилгээ үзүүлэхэд цагдаа нартай учир зүйгээ ололцохгүй байх тохиолдол олон гардаг. Энэ бүх байдлаас харахад энэ арга хэмжээг ингэж их хүч зарж, сүр үзүүлэлгүйгээр зохион байгуулж болоогүй юм уу гэсэн бодол төрж байна” гэлээ. Тэрээр тус эмнэлэгт эмчлүүлж байгаад гарсан байна.
