Өчигдөр 15.00 цагт Хан-Уул дүүргийн 11 дүгээр хорооны нутаг дэвсгэр, Нүхтийн аманд иргэн О.Мэндсайханы захиалгаар баригдаж буй амины орон сууцны барилга нурсан. Нуралт үүссэнээс барилгын ажил гүйцэтгэж байсан таван хүн дарагдсаны нэг нь нас барсан билээ. Энэ дагуу өчигдөр 17.30 цагт МХЕГ-ын Дэд бүтцийн хяналтын газраас газар дээр нь хяналт шалгалт хийхэд нэгдүгээр давхрын багана, дам нуруу, хучилтын хэв гулсан, нэгдүгээр давхрын цутгалт хийсэн багана дам нуруу, хучилт бүхэлдээ нуран унасан байдалтай байжээ. Мөн нойтон бетон зуурмаг доош гоожсон, хучилтын бүх арматур ил гарсан байна.
Нуралт үүссэн шалтгаан нь барилгын гол даац авах баганын цутгалтын ажлыг хийж, бетон зуурмаг нь 70 хувийн бэхжилт авсны дараа дам нуруу, хучилтын хавтан цутгах угсралтын ажлын технологийг зөрчсөн. Мөн багана, дам нуруу, хучилтын хавтанг нэгэн зэрэг цутгасан, баганын цутгалт бүрэн хийгдээгүй 50 хувьтай, дам нуруунуудыг цутгаагүй байхад хучилтын хавтангуудыг 100 хувь цутгаж, ажиллах боломжгүй багана, дам нуруунд ачаалал өгсөн зэрэгтэй холбоотой байжээ.
Мөн барилгын зураг төсөл улсын экспертизийн албаар хянагдаагүй, барилгын талбай дахь зураг төсөлд зохиогчид гарын үсэг зурж баталгаажуулаагүй байсан байна. Барилга угсралтын ажлыг гүйцэтгэж буй Т.Чойжав даамалтай барилгын бригад нь барилгын ажил гүйцэтгэх тусгай зөвшөөрөлгүй байжээ.
Цаашид барилгын нурсан хэсэг болон суурийг бүрэн буулгаж, зайлуулах шаардлагатай байгаа ба хяналт шалгалт үргэлжилж байгааг Мэргэжлийн хяналтын ерөнхий газраас мэдээлэв.
