Шинэ Зеландын Ерөнхий сайд Жон Ки улсынхаа нэртэй кафед зөөгчийн үснээс зулгаасандаа уучлал хүсчээ.

Нэрээ нууцалсан хохирогч эмэгтэй энэхүү мэдээллийг олон нийтэд дэлгэснээр тэрээр ёс бус, дээрэнгүй үйлдлийнхээ төлөө ард түмнээсээ болон үйчлэгч эмэгтэйгээс уучлал гуйхад хүрсэн байна.

Эх сурвалжийн хэлснээр ноён Жон Кигийн түүний уснаас угзарч, татсан дээрэнгүй явдал анхны биш аж. Энэ бол зургаан дахь удаа гарч байгаа хэрэг гэдгийг зөөгч бүсгүй онцолжээ.

Ерөнхий сайд уучлал хүссэн хэдий ч өөрийнхөө үйлдлийг “шоглох төдий хэрэг” байсан хэмээн тайлбарласныг сөрөг хүчнийхэн болон дэмжигчид нь ихээр шүүмжилж байгаа юм. Тэрээр “Би тэр кафегаар олон жилийн турш үйлчлүүлж байна. Тиймээс танил болсон зөөгч нартай тоглоом шоглоом хийж л байдаг” гэсэн байна.

Зөөгч эмэгтэй зүүнтнүүдийн “The Daily Blog” веб сайтад анх энэ тухай мэдээлсэн бөгөөд Ерөнхий сайд нэг сарын хугацаанд зургаан удаа ёс бус үйлдэл гаргасан гэжээ.  

Тэрээр “Эхэндээ би түүнийг тоглож байна гэж хүлээн аваад зүгээр өнгөрсөн. Гэтэл манай кафед ирэх болгондоо энэ үйлдлээ давтах болсон. Би бүр түүний бие хамгаалагчид дахиад ийм үйлдэл гаргах юм бол Ерөнхий сайдыг чинь алгадна эсвэл нүүрэнд нь цохино шүү ч гэж хэлж үзсэн” хэмээн ярьжээ.

Мөн “Энэ нь яг сургуулийн хашаанд дээрэлхүүлж байгаа юм шиг сэтгэгдэл төрүүлсэн. Хэрвээ таван настай хүү ангийнхаа охины үсийг татсан бол би түүнд ингэх хэрэггүй гэдгийг хэлнэ. Харин тэр бол Ерөнхий сайд хүн” хэмээн учирласан байна.

Түүнчлэн тэрээр 53 настай Жон Ки эхнэрийнхээ хамт кафед ирэхдээ ч энэ үйлдлээ давтсаныг сануулжээ. Тэр үед Засгийн газрын тэргүүний эхнэр “Хөөрхий охиныг зүгээр орхи л доо” хэмээн хэлсэн байна.

Ерөнхий сайд Жон Ки уучлал гуйж зөөгч рүү мессеж бичсэн бөгөөд түүнд хоёр шил вино үлдээсэн байна.

Д.Идэр