Саудын Арабын хааны гэр бүлийн гишүүн байлдагчдыг урамшуулж тансаг машин өгөхийг санал болгосон нь ихээхэн шүүмжлэл дагуулжээ. Хунтайж Ал-Валид Бин Талал Йеменд агаарын цохилт өгч буй нисэгчдийг бентлей маркын тансаг машинаар шагнахыг санал болгосон байна.

Тэрээр “Агаарын цохилтод оролцсон дайчдын зүтгэлийг үнэлж Саудын Арабын 100 нисэгчид 100 бентлей өгөхийг санал болгож буйдаа таатай байна” хэмээн өөрийн албан ёсны твиттер хуудсандаа мэдэгджээ.

Хэдий тийм ч 100 бентлей бэлэглэх Хунтайжийн өгөөмөр сэтгэлийг тус улсын нийгмийн сүлжээ хэрэглэгчид төдийлөн сайшаагаагүй байна. Тодруулбал, нэгдүгээрт, агаарын цохилт өгөх ажиллагаанд зуухан цэрэг оролцоогүй тул зөвхөн дарга нарыг шагнасан хэрэг болно. Хоёрдугаарт, үүний оронд бөмбөгдөлтөд өртсөн Йемений энгийн иргэдэд туслах нь үр дүнтэй гэх мэт шүүмжлэлүүд ар араасаа цуварчээ.

Саудын Арабаар удирдуулсан олон улсын цэргийн хамтрал өнгөрсөн сарын 25-аас эхлэн Йеменд агаарын цохилт өгсөөр байна. Хэдийгээр тус улс мягмар гарагт агаарын цохилтоо зогсоолоо хэмээн олон улсад мэдэгдсэн ч одоог хүртэл бөмбөгдөлт үргэлжилсэн хэвээр байгаа юм.  

60 настай хунтайж Валид Саудын Арабын хааны гэр бүлийн хамгийн баян гишүүн юм. Дэлхийн баячуудын жагсаалтад дээгүүр бичигддэг тэрээр 23 тэрбум ам.долларын хөрөнгөтэй бөгөөд “Citigroup”, “Apple”, “Time Warner” гэх томоохон корпорациудад хөрөнгө оруулдаг байна.

Үндэсний хүчнийхнийг бентлейгээр шагнах гэсэн санаа түүний анхны биш юм. Тэрээр өнгөрсөн оны дөрөвдүгээр сард Саудын хөлбөмбөгийн лигт шалгарсан Наср хөлбөмбөгийн клубын ажилчид болон тоглогчдод олон тооны тансаг машинаар бэлэг барьсан билээ.  

Г.Үжин