Энэ сарын 9-нд Хан-уул дүүргийн 11 дүгээр хороо Нүхтийн аманд баригдаж барилга нурсны улмаас таван иргэн дарагдаж, нэг иргэн нь нас барсан хэрэг гарсан. Тус нурангид дарагдсан иргэдийн дөрөв нь нэг гэр бүлийн гишүүд байсан талаар мэдээлсэн билээ. Мөн уг барилга "Аранзал инвест" компанийн захирал О.Мэндсайханы захиалгаар баригдаж байсныг тухайн үед нь мэдээлсэн. Харин эх сурвалжийн мэдээлснээр, уг барилгыг цаад эзэн нь УИХ-ын гишүүн Х.Чойжилсүрэн байжээ. Тэрээр гэр бүлийн иргэдийг Увс аймгаас авчирч ажиллуулж байсан аж. Түүнчлэн уг барилга нь Дархан цаазат газар баригдаж байсан ба холбогдох байгууллагаас зөвшөөрөл ч аваагүй байна. Барилгын нурсан шалтгааныг МХЕГ-аас тогтоосон ч хяналт шалгалт үргэлжилж байгаа юм.