Өнгөрсөн пүрэв гаригт Монгол Улсын Шадар сайд, Улсын Онцгой комиссын дарга  М.Энхболд, ОБЕГ-ын дарга Ц.Амгаланбаяр нар Дорнод аймгийн Чойбалсан хотноо ажиллажээ.
  Өнгөрсөн пүрэв гаригт Монгол Улсын Шадар сайд, Улсын Онцгой комиссын дарга  М.Энхболд, ОБЕГ-ын дарга Ц.Амгаланбаяр нар Дорнод аймгийн Чойбалсан хотноо ажиллажээ.
    Тэд энэ сарын 3-нд тус аймгийн Баяндун сумын нутаг Шивэртийн ам гэдэг газарт гарсан ой, хээрийн түймрийг унтрааж байгаад амь насаа алдсан гурван  алба хаагчийн гэрт очиж, биечлэн уулзаж, эмгэнэл илэрхийлсэн байна. Мөн Монгол Улсын Ерөнхийлөгч, УИХ-ын дарга, Ерөнхий сайд нарын эмгэнэлийн бичгийг ар гэрийнхэнд нь гардуулан өгсөн байна.
Түүнчлэн Цэргийн тэтгэвэр, тэтгэмжийн тухай хууль, Гамшгаас хамгаалах тухай хуульд заасны дагуу Засгийн газрын нөөц сангаас таван жилийн цалин, тэтгэмжтэй тэнцэх хэмжээний мөнгө өгснийг хүлээлгэн өгчээ.
    Албан үүргээ гүйцэтгэж яваад амь эрсэдсэн Онцгой байдлын албаны дэслэгч, 38 настай Ч.Намжилдаш албандаа 16 жил зүтгэхдээ аврагч, шүхэрчин, гал сөнөөгчөөр ажилласан байна. Түүний эхнэр, гурван хүүхэд нь үлдэж байгаа бөгөөд өндөр настай аав ээж, ах дүүс нь гашуудалт мэдээг дуулангуутаа Улаанбаатар хотоос Чойбалсан хотноо ирээд байжээ.     Ч.Намжилдашийн ар гэрт Засгийн газрын нөөц сангаас олгосон 79,4 сая төгрөгийг хүлээлгэн өглөө.
    Мөн 28 настай Ж.Одбаяр нь онцгой байдлын албанд найман жил ажилласан бөгөөд 2004-2005 онд Зэвсэгт хүчний 122 дугаар ангид аврагч, 2005 оноос Дорнод аймгийн Эрэн хайх аврах салбарт аврагчаар ажиллаж байжээ. Талийгаачийнх Чойбалсан хотын орон сууцны 49-р байранд амьдардаг бөгөөд лизингээр байр аваад удаагүй залуу хосууд байсан аж. Эхнэр Н.Нандинцэцэг нь таван настай охин О.Жаргалмаагийн хамт үлдэж байгаа юм байна. Талийгаачийн ар гэрийнхэнд Засгийн газраас өгч байгаа 80 сая 300 мянган төгрөгийг Шадар сайд хүлээлгэн өгсөн байна.
    Ахлах ахлагч, 28 настай С.Бат-Эрдэнэ долоон жил онцгой байдлын албанд ажилласан. Талийгаачийнх Чойбалсан хотын Цэнхэрийн байранд амьдардаг юм байна. Түүний эхнэр, хоёр хүүхдэд нь Засгийн газраас 69,6 сая төгрөгийг өгчээ. Мөн онцгой байдлын салбарын албан хаагчид амь насны даатгалд хамрагддаг бөгөөд Миг даатгалын хамт олон талийгаачдын ар гэр тус бүрт даатгалын 20 сая төгрөгийг хүлээлгэн өгсөн байна.
    Талийгаачдыг ирэх даваа гарагт Чойбалсан хотноо нутаглуулах аж.
    Мөн талийгаачийн ар гэрийнхэн хүлээсэн үүргээ үнэнчээр гүйцэтгэж яваад амь насаа алдсан гурван гал сөнөөгчийн гэгээн дурсгалыг хүндэтгэсэн хөшөөт цогцолборыг орон нутагтаа барьж өгөхийг Шадар сайдаас хүсчээ. Харин ОБЕГ-ын дарга Ц.Амгаланбаяр “Албан үүргээ гүйцэтгэж яваад амь насаа алдсан онцгой байдлын салбарын албан хаагчдын дурсгалыг мөнхжүүлэх хөшөөт цогцолбор Улаанбаатар хотноо байгуулсан бөгөөд жил бүрийн тодорхой өдөр салбарынхан нь уг хөшөөнд хүндэтгэл үзүүлэх уламжлал тогтсон. Гэхдээ та бүхний саналыг хүндэтгэн үзэж, асуудлыг судлан шийдвэрлэхээ амлаж байна” гэлээ.