Исламын алдарт зөнч Мохаммедыг шоглож зурах тэмцээний үзэсгэлэн өчигдөр АНУ-ын Техас мужиын хойд Далласт болсон байна. Гэвч энэ үеэр хоёр буутай этгээд гал нээсэн тухай олон улсын хэвлэлүүд мэдээлжээ.
Үзэсгэлэнг зохион байгуулж байсан хамгаалалтын албаныхан гал нээсэн халдагч этгээдүүдийг аюулгүй байдлын үүднээс буудан хөнөөсөн байна.
Цагдаа нарын мэдээлж буйгаар зэвсэглэсэн этгээдүүд 19 цагийн орчимд буюу үзэсгэлэн дуусах үед танхимд орж ирж, 20 гаруй удаа гал нээсэн байна. Тэд хамгаалах албаныхныг онилон буудсан хэн нэгэн амиа алдаагүй бөгөөд нэг хүн хөлөндөө шархаджээ.
Исламын алдарт зөнчийг шоглох тэмцээнийг Америкийн эрх чөлөөг хамгаалах санаачилга байгууллага спонсорлосон аж. Энэхүү тэмцээнийг исламын шашинтнуудыг доромжилсон хэрэг болно гэдгийг олон хүн анхааруулж, шүүмжилж байсан гэнэ. Гэвч зохион байгуулагчид хамгаалалтын ажиллагаанд ихээхэн анхаарсан хэмээн тайлбарлаж байна. Тэд 10 мянган ам.долларыг 40 цагдаа хөлслөхөд зарцуулжээ.
Уг үйл ажиллагаанд Голландын улс төрч Гийр Вилдерс хүртэл оролцож, тэнд цугласан 150 гаруй хүнд үг хэлсэн байна. Тэмцээний тэргүүн байрын шагнал 10 мянган ам.доллар байсан бөгөөд нийт 350 орчим хүн бүтээлээ явуулж өрсөлдсөн аж.
Өнгөрсөн 12 дугаар сард Францын нийслэлд байршдаг “Чарли Хедбо” сонин зөнч Мухаммедыг шоглож зурсны улмаас халдлагад өртөж 12 хүн амиа алдсан билээ.
Д.Идэр
www.24tsag.mn
Сэтгэгдэл (3)