Оросын мотоцикльчдын “Шөнийн чоно” клубынхан Их ялалтын 70 жилийн ойд зориулан ЗХУ-ын Улаан армийнхны явсан замаар буюу ялалт байгуулсан нутаг Европоор аялаж явна. Гэтэл Гүржид тэдний эсрэг эрүүгийн хэрэг үүсгэсэн тухай “Sputniknews” сайт мэдээлжээ.

Аялалын багийнхныг гүрж эмэгтэй Инга Арахамия мотоциклоосоо Георгиевын туузаа авахыг шаардсанаас энэ хэрэг үүссэн байна.

Өөрийгөө хохирогч хэмээн үзэж буй бүсгүй “Би бол гүрж эмэгтэй. Энэ тууз бол миний эх орныг оросууд түүрэмгийлэн эзэлсний бэлэг тэмдэг учраас үүнийгээ авах хэрэгтэй” гэсэн шаардлага тавьсан аж. Мотоцильчид энэ шаардлагыг нь биелүүлэхгүйгээс эмэгтэй өөрөө тэр туузыг авахаар оролджээ. Тэгэхээр нь мотоцильчид гарыг нь түлхтэл эмэгтэйн гар утас газар унасан байна. Ингээд тэд  хүний биед халдаж, эд хөрөнгийг нь гэмтээсэн хэргээр шалгагдах болсон байна.

“Шөнийн чоно”-нууд Москвагаас гарч Минск, Брест, Вроцлав, Брно, Братислав, Вена, Мюнхен, Прага, Торгау гэсэн хотуудаар дамжин Берлин хүрэхээр төлөвлөжээ. Тэд Польшийн нутгаар дамжих байсан ч Польш тэднийг хилээрээ нэвтрүүлээгүй билээ.

“Шөнийн чоно" клуб нь 1989 оны 5 сарын 31-нд байгуулагдсан бөгөөд Оросын мотоцикльчдын хамгийн анхны клуб аж. 1992 оноос хойш клуб олон улсад бүртгэгдэж, өдгөө 5000 гаруй гишүүнтэй болтлоо өргөжээ.

Энэхүү клубын үйл ажиллагааг ОХУ-ын Ерөнхийлөгч Владимир Путин ихэд дэмждэг. Тиймээс энэхүү аялалыг хийх саналыг В.Путин гаргасан байж мэдэх хэмээн хардах бүлэг байна.

Г.Үжин