БНХАУ олон улсад ажиллах хуульчдын баг бэлдэж байгаа тухай “South China Morning Post” сайт мэдээллээ.
Энэхүү баг нь хоёр томоохон үүрэг биелүүлэх аж. Нэгдүгээрт, хилийн чанадад зугатсан хэрэгтнүүдийг эх оронд нь буцаахад туслах, хоёрдугаарт, хөрш зэргэлдээ орнуудтай үүссэн газар нутгийн маргаантай асуудлуудыг эрх зүйн хүрээнд эцэслэн шийдвэрлүүлэх зорилготой байна.
Эх сурвалжийн мэдээлснээр Хятадын Гадаад хэргийн яам Олон улсын хуулийн хороог энэ оны эхээр байгуулжээ. Уг хороонд Хятадын нэртэй 15 эрдэмтэн, хуулийн мэргэжилтнүүд багтжээ. Тухайлбал, БНХАУ-ын Улс төрийн шинжлэх ухаан, Хуулийн их сургуулийн ерөнхийлөгч, Пекинг их сургуулийн хуулийн профессор, Олон улсын шүүхийн шүүгч асан хууль зэрэг томоохон төлөөлөгчид энэ багт хүчин зүтгэх юм байна.
Бээжин энэхүү ажиллагаагаараа маргаантай улсуудтай хууль эрх зүйн хэлэлцээр хийх сонирхолтой байгаагаа харууллаа хэмээн олон улсын ажиглагчид дүгнэж байна. Түүнчлэн хилийн чанад дахь гэмт хэрэгтнүүүдийг барьж, БНХАУ-ын дарга Ши Жинпиний авлигын эсрэг хөтөлбөрийг төгөлдөржүүлэх болно хэмээн харжээ. Өнгөрсөн сард л гэхэд БНХАУ-ын хууль сахиулагчид олон улсад нуугдсан Хятадын 100 авлигачдын жагсаалтыг гаргаж, АНУ, Канад, Австралид эрэн сурвалжилж байгаа билээ.
Г.Үжин
www.24tsag.mn
