Өчигдөр оройн 10 цагт МАН-ын удирдах зөвлөлийн гишүүд хуралдлаа. Тэд өлсгөлөн зарлаад 10 хонож байгаа МАХН-ын дарга Н.Энхбаярын биеийн байдал муудсан тул яаралтай хуралджээ. Хурлын дараа МАН-ын УИХ дахь бүлгийн дарга Ө.Энхтүвшин сэтгүүлчдэд мэдээлэл өгсөн юм.- Хурлаар ямар шийдвэр гаргасан бэ?
- Өлсгөлөн зарласнаас хойш МАХН-ын дарга Н.Энхбаярын биеийн байдал нь муудсаар байгааг бид хэвлэл мэдээллийн хэрэгслээс байнга мэдээлэл авч байгаа. Хүний амь нас эрсдэх байдалд хүрээд байгаад бид маш их санаа зовж байгаа. Тиймээс өнөө шөнө МАН-ын бүлгийн хурал боллоо. Бүлгийн хурал дээр эмчилж байгаа эмнэлгийн дарга Баясгалангийн мэдээллийг сонслоо. Байдал их хүнд байгааг Г.Баясгалан дарга ярьсан. Эмнэлгийн зүгээс түүнийг батлан даалтанд гаргаад эмчилгээг хэвийн үргэлжүүлэх боломж олгох талаар та бүхэн туслаачээ гэсэн хүсэлт гаргасан. Үүнийг бид зүйтэй гэж үзлээ. Мөрдөн байцаах таслан шийдэх арга хэмжээ нь хуулийнхаа дагуу явдагаараа явх байх. Гэхдээ хэвийн нөхцөлд энэ үйл ажиллагааг явуулах нь зүйтэй гэж МАН-ын бүлгийн гишүүд санал нэгдэж холбогдох байгууллагад энэ саналаа илэрхийлэх нь зүйтэй гэж үзэж, санал нэгдээд тарж байна. Бид өнөө шөнө хуралдаад шүүхийн байгууллагад хандаж заавал цагдан хорихгүй батлан даалтанд гаргаад үйл ажиллагаагаа явуулаач гэсэн хүсэлт тавьж байна.
- Шүүх, хуулийн байгууллагууд амралтын өдөр гээд хариу өгөх болов уу?
- Та бүхнээр дамжуулж шүүхийн байгууллагад хүсэлт тавьж байна. Өнөөдөр, маргааш амралтын өдөр л дөө. Гэхдээ өдөр шөнө гэлтгүй анхаарахгүй бол болохгүй болжээ.
- Үндэсний аюулгүй байдлын зөвлөл хуралдаж байгаа гэсэн мэдээлэл байна?
- Үндэсний аюулгүй байдлын зөвлөлд эмнэлгийнхэн цаг тухайд нь мэдээлэл хүргэж байгаа гэж сонссон.
