МАХН-ын дарга Н.Энхбарын бие хүнд байгаа тул өчигдөр ар гэрийнхэн бол МАХН-ын гишүүд яаралтай арга хэмжээ авч, олон газар хүсэлт гаргалаа. Н.Энхбаярын хүү Э.Батшугар хэвлэлийнхэнд хандаж, мэдэгдэл хийснийг 24tsag.mn  бүрэн эхээр нь хүргэж байна.

    Эмч нарын тайлбарснаар хүний тархи глюкоз буюу сахараар тэжээгддэг юм байна. Харин ийм удаан өлсгөлөн зарласан тохиолдолд тархи нь өөрөө өөрийгөө тэжээх чадваргүй болдог юм байна. Надад маш хүнд байна. Би аавдаа нэг талаал гомдож байна. Миний аав яагаад миний төлөө, миний дүү болон ээжийн төлөө амьдрахгүй байгаа юм бэ гэж. Аав минь Монголын ард түмэн та бүхний төлөө амиа золиосолж байна. Гэхдээ Монголын ард түмэн бол миний аавын хувьд амьдралынх нь утга учир. Тийм учраас би аавынхаа хүсэлтийг хүндэтгэж байна. Гэтэл АТГ болон өнөөгийн эрх баригчид аавыг минь дарга нарын эмчлүүлдэг эмнэлэгт амарч, сувилуулж байна гэж хэвлэл мэдээллээр цацаж байна. Үнэндээ аав минь ямар ч эмчилгээ, хоол, ус хүлээж авахгүй байгаа. Өлсгөлөнгөө хууль бус сахилгын хугацаа нь дуустал үргэлжүүлнэ гэж хэлсэн.

   Одоо өлсгөлөн зарлаад 200 цаг болж байна. Би болон манай гэрийнхэн маш их гутарч хэцүү байна. Заримдаа энэ бүхэн бодит амьдрал биш хар дарсан зүүд байгаасай гэж хүсэх юм. Гэвч энэ бол бодит амьдрал юм аа. Аав минь маш хэцүү, аргагүй байдлын улмаас өлсгөлөн зарласан. Түүнийг ямар ч нотлох баримт, хуулийн дагуу биш, маш зэрлэгээр, араатан амьтан мэт хандсан нь түүнийг хуурай өлсгөлөн зарлахад хүргэсэн юм. Өнөөгийн эрх баригчид эрх чөлөө, ирээдүйн амьдрал, хамаг бүхнийг нь хууль бусаар булааж авлаа. Аав минь бидэндтэй байтугай хэнтэй ч харилцах эрхгүй, зэрлэг амьтан шиг хоригдож эцсийн хүчээ шавхан ард түмэн, шударга ёсны төлөө тэмцэж байна.

   Түүнд өөрийнх нь амь наснаас өөр ямар ч үнэтэй зүйл үлдсэнгүй. Гэсэн ч одоо хүртэл энэ үнэт зүйлээ Монголын ард түмний төлөө зориулж байна. Монголын ард түмэн аавыг минь дэмжиж байгаарай. Та бүхний хүүхдүүд битгий ингэж зовоосой гэсэн үүднээс өнөөдөр ийм аймшигтай өлсгөлөн зарлаж байна. Эцсийн чадлаа ч гэсэн шавхаж та бүхний төлөө зориулж байна. Миний ойлгож байгаагаар аавыг минь соёлтой аргаар алах гээгүй юм бол өнөөдөр нэн даруй суллаж өгөөч ээ. Хүний эрх зөрчих, хилс хэрэг тулгахдаа хууль хяналтынхан хагас, бүтэн сайн хамаагүй ажилладаг юм билээ. Иймээс миний аавыг Үндсэн хуулиар олгогдсон амьд явах, эрүүл байх эрхийг нь эдлүүлж, нэн даруй суллана уу. Сэтгүүлч та бүхэнд хандаж хэлэхэд эрх баригчдын эрхшээлд орохгүйгээр үнэн бодит мэдээллийг ард түмэндээ тарааж өгнө үү гэж хүсч байна.