Энэ долоо хоногт харамсалтайгаар амиа алдсан хэд хэдэн хэрэг гарлаа. Хамгийн харамсалтай нь өнгөрсөн лхагва гаригт Дорнод аймагт гарсан гал түймрийг унтраахаар ажиллаж байсан ОБЕГ-ын таван ажилтны гурав нь амь насаа алдсан хэрэг байв.
      Энэ долоо хоногт харамсалтайгаар амиа алдсан хэд хэдэн хэрэг гарлаа. Хамгийн харамсалтай нь өнгөрсөн лхагва гаригт Дорнод аймагт гарсан гал түймрийг унтраахаар ажиллаж байсан ОБЕГ-ын таван ажилтны гурав нь амь насаа алдсан хэрэг байв. Тэд өнгөрсөн сарын 22-ны өдөр Дорнод аймгийн Чойбалсан сумын нутаг, “Хавирга өртөө”, Гурванзагал сумын Цагаанчулуут, Улаанхонхор, Баянбулаг, Их булаг, Дашбалбар сумын Илтрүүт, Шарвай, Нарсан толгой, Дэл өндөр, Мардай, Улз гол, Чулуунхороот сумын Авдар толгой, Бүс нуур, Эрээнцав,  Халхгол сумын Хар хоньтын застав зэрэг газруудаар тархсан том хэмжээний түймрийг бүрэн унтраахаар ажиллаж байгаад амиа алдсан юм. Хэдийгээр галыг цурманд оруулсан боловч салхины чиглэл гэнэт өөрчлөгдөж, гал яах ийхийн зуургүй аврагчдыг нөмөрсөнөөр тэд амиа алджээ. Тиймээс Засгийн газраас талийгаачдын гэр бүлийнхэнд 69-80 сая төгрөгийн мөнгөн тэтгэмж олгосон билээ. Харин амьд үлдсэн хоёр алба хаагчийн хувьд амьсгалын эрхтэн нь түлэгдсэн учраас биеийн байдал нь маш хүнд байдалтай ГССҮТ-д эмчлүүлж байгаа юм.
   
    Мөн тус өдөр Хан-уул дүүргийн 11 дүгээр хороо “Нүхт”-ийн аманд баригдаж барилга нурсны улмаас таван иргэн дарагдаж, нэг иргэн нь нас барсан хэрэг гарсан. Тус нурангид дарагдсан иргэд нэг гэр бүлийн гишүүд байсан юм. Харин сүүлд уг барилгын цаад эзэн нь УИХ-ын гишүүн Х.Чойжилсүрэн байсан нь илэрч, тус барилга нь Дархан цаазат газар баригдаж байсан, зөвшөөрөл ч аваагүй болохыг МХЕГ-аас тогтоосон ч юм.

    Түүнчлэн энэ долоо хоногт Баянзүрх дүүргийн 11 дүгээр хорооны нутаг дэвсгэр буюу Хонхорын замд автомашины ноцтой осол гарч, машин дотор байсан 20 орчим насны таван залуу хүнд гэмтсэн. Тэдний хоёрынх нь биеийн байдал бүр хүнд, ухаангүй ГССҮТ-д эмчлүүлж байгаа билээ.
  
    Энэ мэт харамсалтай хэргүүд гарахын зэрэгцээ МАХН-ын дарга Н.Энхбаяр асуудал мөн олны анхаарлын төвд байлаа. Учир нь тэрээр өлсгөлөн зарлаад ес хонож байгаа юм. ЭМЯ болон Клиникийн хоёрдугаар нэгдсэн эмнэлгийн удирдах албан тушаалтнууд түүний өлсгөлөнг нэн даруй зогсоохыг шаардсан тэрээр батлан даалтад гаргах хүртэл өлсгөлөнгөө зогсоохгүй гэдгээ мэдэгдсэн. Мөн түүнийг сулла хэмээн МАХН-ын 14 гишүүн Хэлмэгсдийн хөшөөний дэргэд өлсгөлөн зарлаад байгаа. Харин тэдний хоёрынх нь бие өнгөрсөн баасан гаригийн шөнө муудаж, эмнэлэгт хүргэгдсэн юм. Батлан даалтад гарахын тулд, гаргахын тулд Н.Энхбаяр болон ар гэрийнхэн нь холбогдох газруудад удаа дараа албан бичиг, шаардлага, хүсэлт, анхааруулга хүргүүлсэн ч Нийслэлийн прокурорын газраас Н.Энхбаярт холбогдох хэргийг харьяалал тогтоолгохоор Улсын дээд шүүхэд шилжүүлээд байгаа билээ.