Энэ сарын 6-ны өдөр Ерөнхийлөгч Барак Обама АНУ-аас Монгол Улсад суух Элчин сайдад Женнифер Зимдаал Галтын нэрийг дэвшүүлэхээр болсноо зарлалаа.

Женнифер Зимдаал Галт нь Элчин зөвлөхийн зэрэгтэй Гадаад харилцааны албаны мэргэшсэн дипломатч бөгөөд одоогийн байдлаар БНХАУ-ын Гуанжоу хот дахь АНУ-ын Ерөнхий Консулын Газрын Тэргүүнээр 2012 оноос хойш ажиллаж байгаа аж.

Хатагтай Галт 1988 онд Гадаад харилцааны албанд орсныхоо дараа Энэтхэг, Тайвань болон хуучин Югослав улсад ажиллаж байв. 2000-2003 онд тэрээр БНХАУ-ын Бээжин хот дахь АНУ-ын ЭСЯ-нд Соёлын харилцааны асуудал эрхэлсэн туслах дарга, 2003-2007 онд Шанхай хот дахь АНУ-ын Ерөнхий Консулын Газрын Олон нийттэй харилцах албаны даргаар ажиллаж байв. 2008-2010 онд тэрээр Вашингтон дахь Төрийн департаментын Зүүн Ази болон Номхон далайн орнуудтай харилцах товчооны Олон нийтийн дипломат үйл ажиллагааны газрын Дэд даргаар, 2010-2011 онд Бельгийн Брюссель хотноо НАТО дахь АНУ-ын төлөөлөгчийн газарт Олон нийттэй харилцах зөвлөх, 2011-2012 онд Төрийн Департаментын Олон нийттэй харилцах товчоонд Ахлах зөвлөхөөр тус тус ажиллаж байв.

Женнифер Галт нь Колорадогийн Коллежийн Бакалавр, Жонс Хопкинсын Их Сургуулийн Хүмүүнлэгийн ухааны Магистр, Үндэсний Батлан Хамгаалахын Их Сургуулийн Шинжлэх ухааны Магистр зэрэгтэй.