“Тэнгэр трейд” ялаатай импортын бүтээгдэхүүндээ хариуцлага хүлээх ёстой баримтуудыг дэлгэж байна.

“Тэнгэр трейд” ХХК-ийн импортын бүтээгдэхүүн болох “Урбаник”-ын сармисан дотроос ялаа гарсан талаар бид өмнө нь мэдээлсэн.

Гэхдээ лац, ломбыг нь огт хөдөлгөөгүй сармис дотор шүү. Тэгэхээр уг бүтээгдэхүүнийг задлаад хэн, нэгэн нь ялаа хийгээгүй гэсэн үг юм.

Манай сайт уг мэдээллийг сэрэмжлүүлэг болгож гаргасны дараагаар тус компанийн хуулийн зөвлөх гэх эмэгтэй бидэнтэй холбогдож “Танай байгууллагыг шүүхэд өгөх гэж байна. Танай хаяг хаана байдаг юм” хэмээн ёс суртахуунгүй авирлсан талаарх мэдээллийг ч бид хүргэсэн билээ. Харин энэ удаа ялаатай сармистай холбоотой доорх баримтуудыг дэлгэж байна.

1. “Тэнгэр трейд”-ийн импортоор оруулж ирсэн лацтай, “Тэнгэр” гэсэн тамгатай сармис дотор ялаа байгаа нь хэний ч нүдэнд илт байна.

2. Ялаатай сармисаа хянаж, шалгалгүй худалдаанд гаргасан. Үүнээс үүдэж ялаатай бүтээгдэхүүний талаарх мэдээлэл дэлгэгдсэн. Импортын бүтээгдэхүүнийг энэ мэт байдлаар худалдаанд гаргаад байвал цаашид хүний эрүүл мэнд, амь насанд хохирол учруулах хортой бүтээгдэхүүн зах зээлд гарахгүй гэх баталгаа алга.

3. “Тэнгэр трейд”-ийн ажилтан ялаатай сармис худалдан авсан иргэнтэй уулзах үеэрээ сармисыг үзээд “Манай бүтээгдэхүүн мөн байна” хэмээн хэлсэн.

4. “Тэнгэр трейд”-ийн ажилтанууд ялаатай сармис худалдаж авсан иргэнтэй уулзаад “Манай байгууллагад эрсдэлд зориулсан санхүүжилт байдаг түүнээсээ таныг хохиролгүй болгоё” хэмээсэн. Үүнээс үзвэл үнэхээр энэ мэт хүнсний бүтээгдэхүүн дотор гадны биет байгаа нь илчлэгдвэл хэдэн төгрөг өгөөд амыг нь таглачихдаг юм уу гэсэн хардлагыг төрүүлж байна.

5. Худалдаанд гаргасан ялаатай сармисыг иргэн худалдан авсан. Тухайн иргэн “Иргэний үүрэг”-ээ биелүүлж ялаатай сармис худалдаалж буй “Тэнгэр трейд”-ийн импортын бүтээгдэхүүнийг худалдан авахдаа үзэж, шалгаж байхыг сэрэмжлүүлэх үүднээс манай байгууллагад хандсан.

6. Худалдаж авсан сармисаа ялаатай байхыг мэдсэн иргэн гомдол гаргахад ялаатай бүтээгдэхүүнээ 50 мянган төгрөгөөр үнэлж буцаан худалдаж авахыг оролдсон.

7. Хэсэг хугацааны дараа дахин захиралдаа мэдэгдсэн өмнөх мөнгөний санлаа нэг дахин өсгөөд 100 мянган төгрөг болгож ялаатай сармисаа наймаалцахыг хүссэн.

8. Ялаатай сармисаа 100 мянган төгрөгөөр ийнхүү үнэлж, бусдаас нууцлахыг оролдсон.

9. Ялаатай сармис худалдан авсан иргэнтэй хуулийн зөвлөх нь өөрийн биеэр очиж уулзсан. Мэдээлэл өгсөн иргэний хэлж буйгаар тухайн ажилтан ёс суртахуунгүй авирлажээ. Энэ нь ч утасны цаанаас бидэнтэй ярих түүний ярианаас мэдрэгдэж байсан.

10. Сэрэмжлүүлэг болгох үүднээс мэдээлэл гаргасан биднийг  “Байгууллагын хаягаа зааж өг, танайхыг шүүхэд өгнө” хэмээн айлган сүрдүүлсэн.

11. Тус компанийн бичиг хэргийн ажилтантай холбогдоход “Манай байгуулагад ялаатай сармисны талаарх мэдээлэл ирээгүй. Уг нь бүх мэдээлэл надаар дамжих ёстой байдаг юм” гэв.

12. Хэсэг хугацааны дараа эргэн залгаад “Та нөгөө хохирсон гээд байгаа хүнээ манай байгууллага руу ялаатай сармисыг нь өгөөд явуулчих. Бид учрыг нь олоод хохиролгүй болгоё. Ер нь манай бүтээгдэхүүн мөн эсэх, хэн нэгэн манай сармис дотор ялаа хийсэн эсэхийг нь тодруулъя” гэв.

13. Хуулийн зөвлөх гэх эмэгтэй “Би ялаатай сармис худалдаж авсан хүнтэй очиж уулзах нь уулзсан. Харин яг мөнгө өгнө гэж хэлсэн хүн нь би биш шүү” хэмээн өөрийн хар амыг хаацайлав.

14. Түүнчлэн “Тэр ялаатай гээд байгаа сармисыг би харсан. Он сар нь арилчихсан хугацаа нь дууссан үгүй нь мэдэгдэхгүй л юм байсан” гээд уцаарлав. Энэ хүний хэлсэнээр бол хугацаа нь дууссан сармис дотор ялаа орж үхэх магадлалтай аж. Уг нь хугацаа дууссан байлаа ч гэсэн битүүмжилсэн саван дотор ямар ч ид шидээр ялаа орж үхэх боломжгүй байлтай.

15. Энэхүү ялаатай сармис нь 2014 оны 10 дугаар сарын нэгний өдөр үйлдвэрлэгдсэн бөгөөд 2015 оны 10 дугаар сарын нэгний өдөр хугацаа нь дуусах он сартай.

16. “Тэнгэр трейд”-ийнхэн импортын бүтээгдэхүүнээ 100 хувь хянаж, шалгадаг байсан бол ялаатай сармис хэрэглэгчийн гарт хүрэхгүй байсан