Маргааш болох Ардчилсан намын даргын сунгаанд УИХ-ын гишүүн Б.Пүрэвдорж, Ж.Баярмаа, О.Цогтгэрэл нар мөн АН-ын ҮБХ-ны гишүүн Б.Отгонбат нар нэрээ дэвшүүлэн өрсөлдөж байна. Тэгвэл Б.Пүрэвдорж нарын гишүүдтэй өрсөлдөх Б.Отгонбатын боловсролын түүхийг та бүхэнд хүргэж байна. 

Б.Отгонбат нь “Глобал удирдагч” их сургуулийг үүсгэн байгуулагч, eрөнхийлөгч. АНУ-ын Дикинсоны улсын их сургуульд “бизнесийн удирдлага” хөтөлбөрөөр суралцаж бакалаврын зэрэг, Австралийн Кьюнсландын их сургуульд аялал жуулчлалын ахисан түвшний сургалтад хамрагдаж дипломын зэрэг авсан.

2016 онд Харвардын их сургуулийн Жон Ф.Кеннедийн нэрэмжит сургуулийг “төрийн удирдлагын магистр” зэрэгтэй төгссөн. 2025 онд АНУ-ын Ivy League холбооны гишүүн сургууль болох Пэннсильваний Их Сургуулийн боловсролын сургуульд боловсролын ухааны докторын зэрэг хамгаалсан байна. Диссертацийн сэдэв нь “Дэлхийн түвшний их сургуулийг бүтээх манлайллын загвар” байжээ.

Тэрбээр “Америкт суралцах боломж” бэстселлер номын зохиогч агаад "Тагтан дээр" хэмээх номоо уншигчдын хүртээл болгосон. 

Бархүүгийн Отгонбатын бичсэн "Тагтан дээр" ном нь Монгол Улсын ирээдүйн хөгжлийн гарцыг хайсан эрэл, нөгөө талаас манайд нүүрлээд буй манлайллын сорилтыг тодорхойлж, гаргалгаа, шийдлийг нь томьёолохыг зорьсон бүтээл аж.

UBS телевизтэй хамтран хэрэгжүүлсэн “Global CEO”, “Глобал удирдагч” төслүүдийг санаачлагч, зохион байгуулагч юм.

Тэрбээр Харвардын их сургуулийн “жинхэнэ манлайлал”-ын хөтөлбөрийг Монголдоо нутагшуулж, “Глобал удирдагч” их сургуулийнхаа ахисан түвшний хөгжлийн хөтөлбөр болгон хөгжүүлэн ажиллаж байгаа нэгэн аж.