Дорнод аймгийн Баяндун сумын нэгдүгээр багийн нутагт түймрийн голомтонд ажиллаж Онцгой байдлын хэлтсийн дэслэгч Ч.Намжилдаш, ахлагч Ж.Одбаяр, ахлагч С.Бат-Эрдэнэ нар нас барж, ахлах ахлагч Г.Багабиш, дэд ахлагч А.Болорсүх нарын бие түлэгдэн сумын эмнэлэгт хүргэгдсэн. Тиймээс аймгийн цагдаагийн газрын Эрүүгийн цагдаагийн тасгийн дарга, цагдаагийн дэд хурандаа Ч.Лхагвадоржоор ахлуулсан ажлын хэсгийн бүрэлдэхүүн өнгөрсөн мягмар гаригт Баяндун суманд очиж ажиллан түймэр гарсан шалтгаан, нөхцлийг олж тогтоон, Эрүүгийн хуулийн 213 дугаар зүйлд зааснаар /Ой, хээрийн түймэр тавих/ эрүүгийн хэрэг үүсгэн мөрдөн байцаалтын ажиллагааг явуулж эхэлсэн байна.
Мөрдөн байцаалтын явцад тус сумын нэгдүгээр баг /Түргэн баг/-ийн нутаг дэвсгэрт энэ сарын 3-ны өдөр "Багийн найзууд" ХХК-ны уурхайн хариуцлагатай ажилтан Б гэгч нь автомашинтай явж байгаад түр зогсохдоо тамхи татаад тамхины ишний цогийг унтраалгүй хаяснаас болж түймэр гарсан болохыг гэрчүүдийн мэдүүлэг, бусад нотлох баримтаар тогтоогджээ. Түймрийн улмаас гурван хүний амь нас хохирч, хоёр хүн түлэгдэж, Баян-уул, Баяндун, Дашбалбар сумын нутаг дэвсгэр, зүүн хойш 50 км гаруй газрын ой хээрийн бүс шатаж, ОХУ-ын хил дамнан их хэмжээний хохирол учирсан байна. Түймрийг унтраасан хэдий ч хохирлын хэмжээг гүйцэд тооцоолж гараагүй байгаа аж.
Б.Чимэг
