ХБНГУ-ын Канцлер Ангела Меркель өчигдөр ОХУ-д айчиллаа. Айлчлал гэхээсээ илүү тэрээр Дэлхийн II дайнд амиа алдсан орос цэргүүдийн дурсгалыг мөнхлөх цэцгэн хэлхээ өргөх ёслолд оролцжээ.

Украины асуудлаас үүдэн Меркель болон барууны орнууд Оросын Эх орны дайны Аугаа их ялалтын 70 жилийн ойн баярт оролцохоос татгалзсан. Гэвч Германы Канцлер энэхүү арга хэмжээний төсгөлд ирсэн нь дэлхийн нийтийн анхаарлын төвд байв.

Оросын хэвлэлүүд Меркелийн улс төрийн маргаантай байдлыг үл харгалзсан айлчлалыг Германы канцлер Владимир Путинтай харилцаагаа хөндийрүүлэхийг хүсэхгүй байна хэмээн бичжээ. Германы хэвлэл “Дэлхийн II дайн манай улсын хувьд түүхийн асар том хүнд ачаа тул энэ арга хэмжээнд оролцох нь зайлшгүй” гэсэн байна. Харин Германы “Tagesschau” сонины бичсэнээр энэ нь Герман, Орос хоёрын эвлэрэхийн шинж тэмдэг гэжээ.

Ерөнхийлөгч В.Путин Канцлер А.Меркельтэй Москвад уулзсаны дараа хоёр улсын хооронд үүсээд буй асуудлыг аль болох түргэн зохицуулахыг зорьж байгаа тухай ярив. Тэрбээр “Манай хоёр улсын хооронд үүсээд буй нөхцөл байдлыг богино хугацаанд шийдэх тусмаа сөрөг нөлөөлөл нь багасч, харилцаа сайжирна. Өнөөдрийн уулзалтаар хоёр талын харилцаанаас гадна Европын холбооны талаар ч ярилцсан. Мэдээж сүүлийн үед хурцдаж буй Украины асуудлыг голлон хэлэлцлээ. Өнгөрсөн хоёрдугаар сард үзэглэсэн Минскийн хэлэлцээр урагш ахиж байна. Нөхцөл байдал энх тайван болсон ч одоо хүртэл асуудал байгаа” хэмээн ярьжээ.

Харин Ангела Меркель “Хэдийгээр түүх бидэнд мөргөлдөөнийг шийдэх гэж юу ч хийхгүй байхыг харуулж байгаа ч Украины хүнд хэцүү байдал энх тайвны хэлэлцээрээр шийдэгдэж магадгүй” гэжээ.

Г.Үжин