Өнгөрсөн баасан гарагт Их Британийн парламентын сонгуулийн дүн албан ёсоор гарч Консерватив намын ялалт байгуулсныг зарласан.

Тэгвэл нэгдсэн сонгуульд 20 настай эмэгтэй тойрогтоо ялалт байгуулснаар Их Британийн түүхэнд олон зууны хамгийн залуу хууль тогтоогч хэмээн нэрлэгдсэн байна. Тодруулбал, Мхаири Блэк гэх залуухан бүсгүй Шотландын Үндэсний намаас Пэйсли болон Ренфруширын тойрогт нэр дэвшсэн байна. Тэрээр Хөдөлмөрийн намын нэртэй улстөрч Доуглас Александр болон бусад хоёр өрсөлдөгчийг 51 хувийн саналаар ялсан байна.

Британийн түүхэн дэх хамгийн залуу хууль тогтоогч болсон Мхаири Блэк энэ тойрогт олон жилийн туршлагатай ахмад улс төрчдийг ялсан аж.

Гласговын их сургуулийн Улс төр, Олон нийтийн бодлогын төгсөх курсын оюутан бүсгүй өөрийнхөө ялалтын талаар намынхаа сайтад мэдэгдэхдээ ингэж бичжээ.

“Би манай нийгэмд ядуурал, шударга бус явдал ихэд дэлгэрснийг амьдралаараа гэрчилдэг ард иргэдийн нэг. Энэ нь миний Шотландын Үндэсний намаас нэр дэвших шалтгаан болсон. Би эрх мэдэлтэй болсон учраас амлалтаа биелүүлж, Шотландын нийгэмд амин чухал хэрэгцээ болсон нийгмийн шударга ёсыг авчрахыг ихэд хичээх болно” гэсэн байна.

Мхаири Блэк 1667 онд Парламентад 13 насандаа сонгогдсон Кристофер Монкийн дараах Их Британийн хамгийн залуу хууль тогтоогч юм.

Д.Идэр