Энэ сарын 5-нд Ханын материал орчимд үүрэг гүйцэтгэж байсан СХД-ийн Замын цагдаагийн тасгийн цагдаа-зохицуулагчид БНХАУ-ын иргэн халдаж зодохын зэрэгцээ дүрэмт хувцсыг нь урж танхайрсан талаар бид мэдээлсэн. Улмаар хэргийг СХД-ийн цагдаагийн хоёрдугаар хэлтэс шалгаж байгаа юм.
Энэ талаар ЦЕГ-ын хэвлэл мэдээллийн төвийн ажилтан цагдаагийн ахмад Ё.Лхагвасүрэнгээс тодрууллаа.
-Замын цагдаагийн биед хятад иргэн халдсан гэх мэдээлэл байна?
-СХД-ийн долдугаар хорооны нутаг дэвсгэрт 2015 оны тавдугаар сарын 5-нд албан үүргээ гүйцэтгэж явсан замын цагдаагийн ажилтанд БНХАУ-ын иргэн 40 настай Ж гэгч цагдаагийн алба хаагчийн тавьсан хууль ёсны шаардлагыг эсэргүүцэж биед нь халдсан хэрэг гарсан. Энэ хэргийг СХД-ийн цагдаагийн хэлтэс дээр эрүүгийн хэрэг үүсгэн шалгалтын ажиллагааг явуулж байна.
-Цагдаагийн буюу төрийн албан хаагчийг эсэргүүцсэн үйлдэл он гарсанаас хойш хэчнээн бүртгэгдсэн бэ?
-Төрийн албан хаагч буюу хуулиар олгогдсон эрх бүхий олон нийтийн байцаагч, хэв журам сахиулах ажилтны үйлдлийг эсэргүүцсэн зүйл он гарсанаас хойш цөөнгүй бүртгэгдлээ. Эхний дөрвөн сарын байдлаар 81 тохиолдол бүртгэгдсэн. Хууль ёсны шаардлага тавьсан тохиолдолд цагдаагийн алба хаагч буюу төрийн үүргээ гүйцэтгэж байгаа албан хаагчийг эсэргүүцэж доромжилж, биед нь халдсан бол эрүүгийн хариуцлага хүлээлгэдэг хуулийн зохицуулалттай. Иймээс иргэд энэ тал дээр сэрэмжтэй байх хэрэгтэй байна.
-Хэрэв тухайн алба хаагч хэрвээ хууль бус шаардлага тавьсан бол яах вэ?
-Ийм тохиолдолд хууль ёсны дагуу зохих газруудруу мэдэгдэх зайлшгүй шаардлагатай. Хууль ёсны шаардлага тавьж байхад нь эсэргүүцэж, хэл амаар доромжилж биед нь халдвал энэ нь эрүүгийн хуулийн 230, 231 дүгээр зүйл ангиар хэрэг үүсгэх нөхцлийг бүрдүүлж байгаа юм. Энэ зүйл анги дээр хөдөлмөрийн хөлсний доод хэмжээг 81-100 дахин тэнцэх хэмжээний төгрөгөөр торгох, энэ хэргийн улмаас тухайн алба хаагчид хүнд гэмтэл учирсан бол 8 хүртэлх жилээр хорино гэж заасан байдаг.
Төрийн албан хаагч, хэв журам олон нийтийн байцаагчийг эсэргүүцсэн хэл амаар доромжилсон бол албадан ажил хийлгэх, эсвэл гурван сар хүртэлх хугацаагаар баривчлах хүртэлх хариуцлага тооцдог.
-Гадаадын иргэн цагдаагийн алба хаагчид халдсан нь багагүй хэл ам дагуулж орхилоо. Үүнд ГИХАЭГ-аас ямар хариуцлага тооцдог юм бол?
-Монголд оршин сууж байгаа гадаадын иргэн төрийн албан хаагчид халдсан бол Монгол Улсын хуулиар шийдэгдэнэ. Учир нь Монгол Улсын нутаг дэвсгэрт гарч байна.
-Хууль шүүхийн шийдвэрт нөлөөлөхийг оролдвол хэрхэх вэ. Энэ хятад иргэний тухайд цагдаагийн байгууллагаруу янз бүрийн эрх мэдэлтнүүдээр яриулж байгаа гэх яриа байна?
-Энэ нь өөрөө хуулиараа хориглосон үйлдлүүд. Хуулиндаа ч заасан байгаа. Монгол Улсын газар нутагт үйлдсэн хэрэг хуулиараа шийдэгдэнэ. Үүнд ямар нэг гадны нөлөө орох үндэслэл байхгүй. Нөлөөлөхийг оролдож, мөрдөн байцаалтад саад учруулахыг оролдвол хуулийн хариуцлага хүлээдэг.
Д.Ундрах /24tsag.mn/
