Хойд Солонгосоос дүрвэж ирсэн нэгэн иргэн улсынхаа удирдагч Ким Чен Унтай холбоотой нэгэн ноцтой баримтыг дэлгэсэн талаар барууны хэвлэлүүд мэдээллээ. Дүрвэгч Пакийн ар гэрийнхэн нь эх оронд нь байгаа учраас тэрээр жинхэнэ нэр бүтнээр хэлэх, царайгаа харуулахаас татгалзсан байна.

Эх сурвалжийн мэдээлснээр Ким Чен Ун  2013 оны арванхоёрдугаар сард хүргэн ах Чан Сон Тэкийг цаазаар авсны дараа түүний эхнэр, цусан төрлийн хамаатан болох авга эгчээ хороосон гэж ярьжээ.  

Тэрээр авга эгч Ким Кён Хуйг хордуулж хөнөөх тушаал оноосон бөгөөд цаазын ялыг тавдугаар сарын 5-6-ний үед гүйцэтгэсэн хэмээн ярьсан байна.

Авга эгч нь нөхрийг нь цаазалсанд гомдолтой басйан учир түүнийг чимээгүй болгохын тулд хөнөөсөн хэмээн Пак ярьжээ. Мөн тэрээр энэхүү мэдээллийг Хойд Солонгосын цэргийн болон төрийн томоохон албан тушаалтнууд мэдэж байгаа ч олон нийтээс нууцалсан гэжээ.

Ким Кён Хуйг Хойд Солонгосын хэвлэлүүд цус харвасан, зүрхний шигдээс болсон, амиа хорлосон, тархины хавдраа авахуулах мэс засалд орсон гэх зэргээр бичиж байсан аж.

Г.Үжин