Өнөөдөр МАХН-ын дарга Н.Энхбаярын арван жилийн ангийнх нь хүүхдүүд МУ-ын ерөнхийлөгч Ц.Элбэгдоржид захидал хүргүүлжээ. Тус захидлыг бүрэн эхээр нь толилуулж байна. “Монгол Улсын ерөнхийлөгч Ц.Элбэгдорж танаа Монголын ард түмний эв нэгдлийн илэрхийлэл болсон Эрхэм хүндэт Ерөнхийлөгчөө!
Монгол Улсын гуравдагч Ерөнхийлөгч Н.Энхбаяртай эрдэм номын өргөөнд арван жил тохой залган сурч боловсорч, тоглож наадаж өссөн ангийн хамт олон нь танд хандаж байна. Бидний цөөхөн монголчуудын хувьд эрдэнэт хүний амь гэдэг нь дэндүү их үнэ цэнэтэйг цэгнэж та ч монголчууд олуулаа больё гэж уриалдаг шүү дээ. Монголчууд бидний нэг, ангийн нэг нөхрийн маань амь насанд аюул учирч дээсэн дөрөөн дээр ирээд амьд байх эсэх нь хором хормоор тоологдох боллоо. Жирийн монголчууд, иргэдийн сэтгэлийг түгшээсэн энэ цаг мөчид эрдэнэт монгол хүний алтан амийг аврахад чиглэсэн алхам хийхийг олон түмний нэгэн адилаар Н.Энхбаярын арван жилийн ангийн хамт олон танаас хүсэж байна. Монгол улсад жинхэнэ шудрага ёс хуулиа дээдэлсэн иргэний эрх зүйт нийгмийн төлөө байдгаа та баталж бидний хүсэлтийг хүлээн авч Н.Энхбаярыг гадуур батлан даалтад өгч хуулийн ажиллагааг нь жирийн нөхцөлөөр үргэлжлүүлэх шийдвэр гаргахыг хүсье. Бидний хамт олны нэг Монгол Улсын гуравдагч ерөнхийлөгч Н.Энхбаярын амь нас таны үйлдэл эс үйлдлээс хамаарах болоод байгааг та анхааралдаа авна уу. Нийслэлийн арван жилийн 23 сургуулийн 1975 оны 10 б ангийн төгсөгчид” гэжээ.
