Сайд нарын дундаас твиттер хуудасдаа хамгийн идэвхитэй сэтгэгдэл бичдэг хүн бол Сангийн дэд сайд Ч.Ганхуяг. Тэрбээр улс төр, нийгэмд болж байгаа үйл явдлын талаар өөрийн санал, бодлыг цаг алдалгүй илэрхийлж байдаг. Энэ удаад ч МАХН-ын дарга Н.Энхбаярыг АТГ баривчилсан, хуурай өлсгөлөн зарлаж бие нь муудсан, үүнд нь зарим хүн ерөнхийлөгч Ц.Элбэгдоржийг буруутгаж байгаа талаар өөрийн байр суурийг твиттер хуудасдаа бичжээ. Ч.Ганхуяг МАХН-ын даргын тухайд “Н.Энхбаярын асуудлыг иргэн гэхээсээ Монгол улсын ерөнхийлөгч асан, нийт сонгогчдын 50 шахам саналыг гурван жилийн өмнө авсан хүн гэдгээр хандах хэрэгтэй” хэмээн хүндэтгэж байгаа бичсэн байна. Тэгвэл ерөнхийлөгч Ц.Элбэгдоржийн тухайд “Бид дөрвөн ерөнхийлөгчийн нүүр үзлээ. Ерөнхийлөгчийн засаглалад хамгийн их дөхүүлж чадсан, хөтөлж аваачиж байгаа нь дөрөв дэх нь” гэж ихэд магтжээ. Өмнө нь талхны үнэ мэддэггүй гэж баахан шүүмжлүүлж, "талх судлаач" гэсэн хоч авч байсан түүнийг "хэзээ, хаана, юу ярихаа мэдэхгүй, будлиа нөхөр" гэж цөөнгүй хүн ярьдаг.  Гэхдээ олон нийт хоёр хуваагдчихаад байгаа энэ үед Сангийн дэд сайд хэн нэгнийх нь талд оролгүй “төв үзэлтэй” байхыг илүүд үзсэн бололтой.