Увс аймгийн 90 жилийн ойг тохиолдуулан Монгол Улсын Хөдөлмөрийн баатар, ЗХУ болон Монгол Улсын гавьяат тамирчин, Монгол үндэсний бөхийн дархан аварга, олимпийн мөнгөн медальт, чөлөөт бөхийн дэлхийн аварга, XX зууны манлай бөх, сурган хүмүүжүүлэх ухааны дэд доктор Хорлоогийн Баянмөнхийн хөшөөг Увс аймгийн төв Улаангом хотын спортын ордны урд талбайд босгохоор болжээ.

Уг хөшөөний суурийн загварыг дэлхийн бөх гэдгийг нь бэлгэдэж бөмбөрцөг хэлбэртэйгээр гаргаад байгаа юм. Түүхэн дурсгалт хөшөөг урлан бүтээж байгаа уран бүтээлчдийн өгүүлснээр, маш олон хүчтэй өрсөлдөгчийн дундаас үндэсний болон чөлөөт, самбо бөхийн ноён оргилд хүрсэнийг нь далайн шуурга салхи мэт дүрсээр яруу тодоор илэрхийлэн гаргасан нь олон түмний таашаалд нийцэж байгаа юм.