Олимпийн таэквондогийн дэлхийн аваргын тэмцээнд С.Янжинлхам шагналт 8 дугаар байрт шалгарлаа.

Дэлхийн аварга шалгаруулах таэквондогийн тэмцээн Оросын Челябинск хотноо 05 сарын 10-18 хүртэл явагдаж 141 орны 900 орчим тамирчид оролцож байна.

Энэ тэмцээнд Монголын эмэгтэй 46 кг жингийн тамирчин С.Янжинлхам шагналт 8 байрт орлоо. Тэрээр энэ тэмцээний аварга, дэлхийн 2015 оны алтан медальт Тайландын тамирчинд 4 дэх тойрогтоо хожигдон анх удаагаа Монголын тамирчдаас дэлхийн аваргын тэмцээний шагналт 8 дугаар байрт шалгарсан сайхан амжилт үзүүлжээ.

С.Янжинлхам нэгдүгээр тойрогтоо Малайзын тамирчин С. Тирунакарасуг техникийн илт давуугаар цэвэр хожиж, 2 тойрогтоо Канадын тамирчин (солонгос гаралтай) Ю.Еонг тэнцүү өрсөлдөн 5:4 харьцаагаар хожин, 3 тойрогтоо Дэлхийн таэквондогийн холбооны нэрийн өмнөөс орж байгаа тамирчин А.Гоффиныг илт илүүрхэн 13:0 хожсон юм. Ийнхүү 3 хожил авч С.Янжинлхам шагналт 8 дугаар байрт шалгаран хүрэл медалийн төлөө өрсөлдөхөөр шалгарчээ.

Сугалаа ёсоор 4 тойрогтоо энэ тэмцээний аварга болсон Тайландын П.Вонгпаттанакитай таарч 8:1 харьцаагаар хожигдсон юм.

С.Янжинлхамын хувьд дэлхийн аваргын тэмцээнд оролцож байгаа Монголын тамирчид дотроосоо хамгийн өндөр амжилт үзүүлэн олимпийн төрлөөр дэлхийн аваргын тэмцээнээс Монгол тамирчин медаль авахад ойрхон болсон байгааг илтгэн харууллаа. Тэрээр Үндэсний шигшээ багийн тамирчин бөгөөд РИО 2016 олимпийн наадамд оролцох эрхийн төлөө хүчээ сорьж байгаа манай улсын шилдэг эмэгтэй тамирчин юм.

Түүний жинд медальт байранд шалгарсан тамирчдыг танилцуулья.

Алтан медаль- Панипак Вонгпаттанакит, Тайланд
Мөнгө- Ирина Ромолданова, Украин
Хүрэл-Ирис Танг Синг, Бразил
Хүрэл-Ван Тинь Лин, Хятадын Тайвань
ШАГНАЛТ БАЙРАНД:
С.ЯНЖИНЛХАМ-МОНГОЛ
М.Смирнова-ОХУ
Шаоюи Ли-БНХАУ
К.Коуттоуки-Кипр улсын тамирчид шагналт 8 дугаар байранд шалгарчээ.