Энд тун сонирхолтой гэмээр тэр ч бүү хэл бараг домог шахам болсон бооцоонуудын заримаас сонирхуулах болно.
Кубын нэрт зохиолч Э.Хэмингуэй нэгэн зохиолчтой мөрий тавьж, 10 үгээс бүтэх өгүүллэгийг утга зохиолын бүх онол зарчмын дагуу эхлэл, өрнөл, тайллыг нь бүрэн багтааж бичихээр болжээ. Гэтэл хэсэгхэн хормын дараа Хэмингуэй 10 бус зургаан үгэнд багтаасан өгүүллэг бичиж, мөрий болох мөнгөө авчээ. Тэрбээр, “Хүүхдийн шаахай худалдана. Хэн ч түүнийг өмсөөгүй” гэсэн байжээ.
Клеопатра Марком Антониетэй 10 сая зоосны мөрий тавьж, цагаан цуутай дарс нэг хундагыг ууна гэжээ. Марк түүнийг ууж чадахгүй гэдэгт бүрэн итгэлтэй байсан учир огт тоолгүй ийнхүү их хэмжээний мөнгөөр мөрийцсөн байна. Гэвч эмэгтэйчүүд гэж ихээхэн зальны хөрөнгө байдаг гэдгийг тэрбээр огтхон ч тооцоогүй аж. Хатан хаан цагаан цуу бүхий дарстай хундага өгөхөд нь өөрийнхөө хамгийн үнэтэй хар сувдыг хийгээд ажиг ч үгүй ууж орхижээ. Марк ч мөрийгөө өгөхөөс өөр аргагүй болов гэнэ. Хожим энэ домог үнэний ортой байж болохыг эрдэмтэд нотолсон байдаг. Учир нь сувд, цагаан цуу хоёр урвалд орсноор ямар ч үйлчилгээгүй болдогийг тогтоожээ.
XVIII зуунд Английн гүн Уильям Дуглас гэж нөхөр амьдарч байжээ. Тэрбээр хийх ажилгүй нэгэн байсан тул ихээхэн уйдна. Тиймээс хөзөр, дарсанд орж, тэр дундаа хэн нэгэнтэй мөрийцөх нэн сонирхолтой нэгэн болов гэнэ. Хамгийн гайхмаар нь ихэвчлэн мөрийгөө авна. Түүний тавьсан хамгийн алдартай мөрийний нэг нь тодорхой хаягаар цагт 50 милийн хурдтайгаар захидал илгээж чадна гэжээ. Нэлээд ч том мөрий тавьсан юм байх. Ингэхэд тэр үед шуудангийн тагтаа цагт 44 милийн хурдтай нисдэг байж л дээ. Гэтэл тэрбээр захидлын эзнийхийг хүртэл замын дагуу хамгийн хурдан гэх тодотголтой крикет тоглодог 20 хүн зогсоогоод бөмбөгөнд нь захидлаа боосноор 50 милийн хурдтайгаар дамжуулж мөрийгөө авч байсан ажээ.
Ийм мөрийг Америкийн эрдэмтэд хоорондоо тавьсан байна. Гэвч энэ мөрийний 500 сая долларыг авах хүн 136 жилийн дараа тодроно. Тэд ингэхэд юугаар мөрийцсэн бэ гэвэл хүний биеийн хөгшрөлтийг судалдаг хүмүүс болохоороо ирээдүйд хүн хэд хүртэл наслах вэ хэмээн мэтгэлцжээ. Нэг хэсэг нь хүн 150 хүртэл наслах бүрэн боломжтой гэж үзсэн байна. Мэдээж нөгөө тал нь ямар ч боломжгүй гэнэ биз дээ. Ингээд 2000 онд төрсөн хүн 150 наслана, үгүй гэж мөрийцсөн хүмүүс хоёр талаасаа жил бүр 150, 150 доллар банкинд хадгалуулахаар болжээ. Ингэсэн тохиолдолд хүү нь өссөөр 136 жилийн дараа яг хагас тэрбум доллар болохыг тооцоолсон байна. Хэдийгээр тэд энэ хүртэл наслахгүй гэдгээ мэдэж байгаа ч хойч үедээ уг мөрийгөө үе дамжуулан залгамжлуулахаар тохиролцжээ.