Өчигдөр МАХН-ын дарга Н.Энхбаярыг батлан даалтад гаргах шийдвэрийг 16 цагт Сүхбаатар дүүргийн шүүхээс гаргалаа. Батлан даалтад гаргах шийдвэр гармагц УИХ-ын гишүүн, МАХН-ын дэд дарга Д.Тэрбишдагва, УИХ-ын гишүүн, МАХН-ын нарийн бичгийн дарга О.Чулуунбат нар Төрийн ордоноос Клиникийн хоёрдугаар эмнэлэгт иржээ.
Мөн “Амлалт нэхэх ард түмний холбоо”-ны тэргүүн Г.Уянга МАХН-ын дэмжигч, гишүүн 30 гаруй иргэдтэй хамт эмнэлгийн гадаа зогсож байв. Хэдийгээр батлан даалтад гаргах шийдвэр гарсан ч тогтоолыг Н.Энхбаярт албан ёсоор өгөөгүй учир эмнэлэг доторх цагдаагийн хамгаалалт буугаагүй байлаа.
Төд удалгүй МАХН-ын нарийн бичгийн дарга Л.Цог хүрэлцэн ирэв. Түүнийг машинаас буумагц МАХН-ын гишүүд, дэмжигчид баяр хүргэн, гар барьцгааж байсан юм. МАХН-ын гишүүд ч бие биедээ баяр хүргэж “Агуу хүн тулдаа арван хоног тэслээ. Аргагүй л Н.Энхбаяр дарга мөн дөө”, “Дарга маань суллагдсан чинь гадаа хүртэл нар гараад сайхан байна. Одоо энэ баярт мэдээгээ хэнд хүргэх вэ?”, “Өө тийм, хөдөө орон нутгийн дэмжигчиддээ хүргье. Бид тэмцлийнхээ үр дүнг үзлээ” гэх мэт сонирхолтой яриа өрнөсөн юм. Мөн Н.Энхбаярын өмгөөлөгч Ганбаатарыг эмнэлгээс гарч ирэхэд баяр хүргэж “Таны ачаар дарга маань суллагдлаа” та бүхэн сайн ажилласан шүү гэцгээж байв.
О.Цолмон, Э.Батшугар, Н.Удвал, М.Энхсайхан нар батлан даав
Намын гишүүд болон Н.Энхбаярын гэрийнхэн хоёрдугаар эмнэлгийн гадаа хүлээж байсан 17.00 цагийн үед МАХН-ын дарга Н.Энхбаярыг батлан даалтад гаргах тогтоолыг Сүхбаатар дүүргийн шүүхийн Тамгын газрын дарга Х.Батсайхан танилцуулсан юм. Тэрбээр “Сүхбаатар дүүргийн шүүхийн тавдугаар сарын 14-ний өдрийн 386 тоот захирамжаар МАХН-ын дарга Н.Энхбаярыг түүний эхнэр О.Цолмон, хүү Э.Батшугар, МАХН-ын ерөнхий нарийн бичгийн дарга Н.Удвал, МҮНН-ын дарга М.Энхсайхан нар батлан дааж авсан болно. Н.Энхбаярыг шүүхийн шийдвэрийн дагуу батлан даалтад гаргаж байгаа тул энэ үеэс эхлээд цагдаагийн хамгаалалтыг буулгаж байна” гэсэн мэдээллийг хэвлэлийнхэнд өгсөн юм.
“Энх-баяр”-ын дуу
Түүнийг батлан даалтад гаргах тогтоолыг танилцуулсны дараа Н.Энхбаярыг батлан даалтад гаргахыг шаардан өлсгөлөн зарлаад байсан 12 иргэн зорилгоо биелүүлсэн хэмээн өлсгөлөнгөө зогсоосноо мэдэгдэв. Мөн намын гишүүд дэмжигчид, Н.Энхбаярыг хэвтэж буй өрөөний цонхны дор “Даргаа та чадлаа. Хүчтэй байгаарай” хэмээн урамшуулж, эмнэлгийн гаднаас дуу дуулж өгөв.
Д.Тэрбишдагва, О.Чулуунбат нарын рейтинг өсөв
Н.Энхбаярыг өлсгөлөнгөө зогсооход ихээхэн чармайлт гаргасан МАХН-ын дэд дарга, УИХ-ын гишүүн Д.Тэрбишдагва, МАХН-ын нарийн бичгийн дарга О.Чулуунбат, МАХН-ын ерөнхий нарийн бичгийн дарга Н.Удвал нар эмнэлгээс гарч ирэхэд тэднийг “баатар”-ын ёсоор угтсан. УИХ-ын гишүүн Д.Тэрбишдагва гишүүнийг хэвлэлийнхэн бүчин авав. Харин О.Чулуунбат гишүүнд МАХН-ын дэмжигчид баяр хүргэж, “Улам хүчтэй байгаарай. Та бүхэн чадсан. Бид ч гэсэн та бүхнийг сонгохоо амлаж байна” хэмээн амлалтыг өгсөн юм.
Зурагчнаас зугтсан Н.Энхбаярын аав, ээж хоёр
МАХН-ын удирдлагуудыг явсны дараа эмнэлгээс МАХН-ын дарга Н.Энхбаярын аав, ээж гарч ирлээ. Хэвлэлийнхэн аав, ээжийнх нь зургийг авах гэтэл Н.Энхбаярын ээж уурлан, нэг зурагчинг цүнхээрээ цохиод авав. Төд удалгүй хоёр гурван залуу зураг авч байгаа зурагчид руу дайран, зураг авахуулахгүй аав, ээжийг нь хаан авч явлаа.
Тагтан дээрх Э.Батшугар
Хэвлэлийнхний өмнө тэр бүр гараад байдаггүй Э.Батшугар эмнэлгийн тагтан дээр инээд алдсаар гарч ирсэн юм. Тэрээр маш баясгалантайгаар “Аав одоо энэ цонхон дээр гарч, та бүхэнтэй мэндлэнэ” гэв. Харин МАХН-ын дэмжигчид “Батшугараа аавыгаа хайрлаж яваарай. Аав чинь сайн хүн шүү” хэмээн зөвлөгөө өгч байлаа. Харин Э.Батшугарын царайд инээмсэглэл тодорч “За тэгнэ ээ” хэмээн хариулж байв. Гэвч төд удалгүй Э.Батшугар “Эмч нар цонхон дээр гарах арай болоогүй. Эрүүл мэндэд нь муу гэнэ. Тиймээс цонхны цаанаас аав та бүхэнтэй мэндлэнэ” гэлээ.
Арав хоногийн дараах Н.Энхбаяр
Арав гаруй минут хүлээлгэсний эцэст МАХН-ын дарга Н.Энхбаяр цонхны цаанаас дэмжигчидтэйгээ хоёр гараа өргөн мэндлэв. Тэрээр хоригдохдоо өмссөн ногоон цамцтайгаа зогсож байв. Дэмжигчид “Биеэ сайн бодоорой. Хурдан эдгээрэй” хэмээн өмнөөс нь гараа даллацгааж байлаа.
/24tsag.mn/
Сэтгэгдэл (6271)