Өчигдөр МАХН-ын дарга Н.Энхбаярыг батлан даалтад гаргасан үйл явдлын гол “баатар” нь УИХ-ын гишүүн Д.Тэрбишдагва, О.Чулуунбат нар байв. Н.Энхбаярыг батлан даалтад гаргахын тулд ерөнхийлөгчтэй уулзаж, янз бүрийн арга хэмжээ авч байсан тэдэнд МАХН-ын гишүүд талархаж байгаагаа хэлж байсан. Д.Тэрбишдагва гишүүн ч Сүхбаатар дүүргийн шүүхээс шийдвэр гарсан даруйд фэйсбүүк хуудасдаа “Цаг үргэлж надтай, бидэнтэй хамт санаа зовж, сэтгэл зүйн асар их дэмжлэг үзүүлж байсан Та бүхэндээ баярлалаа” гэж бичжээ. Хоёрдугаар эмнэлгийн гадаа зарим хүн түүнд санал өгөхөө гар барин хэлж байсан бол дээрх үгийг нь уншсан зарим нь бас эгдүүцсэн байна. “Н.Энхбаярын хэргээр өөрийгөө рекламдаж, сонгуулийн сурталчилгаагаа хийлээ”, “Ганцаараа хийсэн юм шиг аашиллаа” гэх зэргээр дургүйцлээ илэрхийлжээ.